"ЖЧ-2026". Холанд дубль қилди, Норвегия Сенегални мағлуб этди

2026 йилги Жаҳон чемпионати гуруҳ босқичи 2-турида Норвегия терма жамоаси Сенегал устидан 3:2 ҳисобида ғалаба қозонди.

Нью-Йорк шаҳридаги "МетЛайф" стадионида бўлиб ўтган учрашувда ҳисоб 43-дақиқада очилди. Маркус Педерсен норвегияликларни олдинга олиб чиқди.

Иккинчи бўлим бошида Эрлинг Холанд ўз сўзини айтди. Ҳужумчи 48-дақиқада гол урган бўлса, 58-дақиқада яна бир бор рақиб дарвозасини ишғол қилиб, дубль муаллифига айланди.

Сенегал ҳам таслим бўлмади. Исмаила Сарр 53-дақиқада ҳисобдаги фарқни қисқартирган бўлса, учрашувга қўшиб берилган вақтнинг 3-дақиқасида иккинчи голини урди.

Бироқ бу Сенегални мағлубиятдан қутқариб қола олмади. Учрашув 3:2 ҳисобида Норвегия фойдасига якунланди.

Шу тариқа, Норвегия муҳим уч очкони қўлга киритиб, плей-офф масаласини ҳал қилди.