Жоан Лапорта - “Барселона”нинг янги президенти: У ким ва нималарни режалаштирган?

Кеча “Барселона” президентлиги учун якуний сайлов бўлиб ўтганидан хабардорсиз. Сайлов натижаларига кўра, Жоан Лапорта клуб президентлигига сайланди. Сўнгги йилларда Европада ўзига ярашмайдиган натижалари билан ҳаммани ҳайратда қолдирган “Барселона”да узоқ муддат давомида ишнинг нотўғри йўлга қўйилгани ҳақида олдинги мақолаларда ҳам гапирган эдик.
Бартомеу ҳақидаги тахминларимиз ҳам ўзини оқлаб, собиқ амалдорнинг қилмишлари жиддий тергов қилинмоқда. Ҳозирча у озодликка чиқарилди, аммо бу тўлиқлигича жазодан қутулганини англатмайди.
“Блаугранас” янги даврни бошлаш арафасида турибди. Катта ёшли футбол мухлислари учун Лапорта номи бегона эмас. У 2009 йилда жамоа билан 6 та соврин ютишга эришган ва бу Европада тенгсиз рекорд ҳисобланади. Яъни, ҳеч бир клуб бир календарь йили ҳисобидан 6 та титул ютишга муваффақ бўлмаган. Ўтган мавсум Мюнхеннинг “Бавария”си барча совринларни қўлга киритгани рост. Аммо улар бу ишни бир йил давомида амалга оширмади. Клублар ўртасидаги жаҳон чемпионати ўтган ой бўлиб ўтганидан хабардорсиз. Қисқаси, Лапорта клубга янги режалар билан ташриф буюрмоқда. Биз эса, унинг фаолияти ва янги режалари ҳақида қисқача маълумот беришга ҳаракат қиламиз.

Лапорта ким?
Жоан Лапорта 2003-2010 йиллар мобайнида “Барселона”да президентлик қилган клубнинг афсонавий раҳбарларидан бири. Сабаби, айнан унинг қўли остида каталонияликлар Европада фурор кўтарганди. Ўша даврда “Ла Масия” дунё футболига қанчадан қанча юксак иқтидорларни етиштириб берганди. Роналдиньо бошчилигидаги жамоанинг қурилиши ҳам айнан Лапорта даврига тўғри келади. “Ронни”нинг узоқ йиллик муваффақиятли фаолиятидан сўнг, етакчилик эстафетаси Мессига ўтади. Европа грандларидан қанчалик катта таклифлар тушмасин Лапорта Леони ўз жамоасида сақлаб қолади ва ҳақли равишда унга “кўк-анорранглилар” келажаги сифатида қарайди. У клубни тарк этаётган бир пайтда Месси 22 ёшда эди. Демакки, уни “Барса”да катта бир тарих яратган ва янги даврни бошлаб берган шахс сифатида кўришимиз ҳам мумкин.
У сайловдаги ғалабаси орқали 2026 йилгача раҳбарлик қилиш имкониятига эга бўлди.

Унинг президентлик компанияси нималарни режа қилган?
Клуб мухлислари ундан сўрайдиган биринчи савол барчага маълум: Месси қоладими? Лапорта бу борада анча ишонч билан ижобий фикр билдиряпти. У, шунингдек, клубда иқтисодий ҳолатни барқарор ҳолатга келтиришни ҳам ўз мақсади сифатида маълум қилган.
У йил аввалида “Goal.com” нашрига берган интервьюсида бу борада қуйидаги фикрларни билдириб ўтганди: “Мен Мессига таъсир кўрсата оладиган энг тажрибали инсонлардан бириман, деб ҳисоблайман. У доим менга очиқ гапира олган ва у билан шу каби яқин муносабатда эканимдан мамнунман. 2024 йилда “Камп Ноу” 125 ёшга киради. Бу тантанали маросимни Месси билан кутиб олиш ажойиб бўлади. Ўшанда биз уни улкан олқишлар билан кузатиб қўйишимиз мумкин бўлади”.

Номзодлар ҳақида
Тони Фрейша ва Виктор Фонт ушбу сайловда номзод сифатида иштирок этди. Аммо уларнинг ғалабага эришиш эҳтимоли жуда кам эди. Сайлов компаниясининг энг бошиданоқ, Лапорта катта устунликка эгалиги тахмин қилинаётган эди.
Фонт 30 фоиз овоз тўплади. У ҳамон клуб раҳбарияти аъзоси ҳисобланади. Тони Фрейшанинг эса сайловда ғалаба қозониши фантастика бўларди. Сабаби, у ёш ва клуб мухлислари учун нотаниш бўлган шахс. Ҳозирча, у “Барселона”нинг янги раҳбарияти қаторида бўладими ёки йўқ, бу маълум қилинмаган.

Бартомеуга нима бўлди?
“Барса”нинг собиқ президенти жамоадаги ўз мавқейини сақлаб қолиш мақсадида “Barcagate” лойиҳасини амалга оширишга уринган. Унда клубнинг бир қатор юлдузлари обрўсини тушириш мақсадида футболчиларнинг шахсий маълумотларини яширинча ҳамкорлик қилган компаниясига очиб берган. Хабар берилишича, маълумотлари очиқланган футболчилар орасида Месси, Пике ва клуб афсонаси Хави бор.
Ҳозирда Бартомеу тергов далилларининг тўлиқ исбот қилинмагани боисидан озодликка чиқарилди. Аммо суриштирув ишлари охирида у катта эҳтимол билан жазога тортилади.

Ҳозирги “Барса”да ҳолат қандай?
Клуб ҳозирда 1,4 млрд доллар зарар кўрган. Бундай ҳолатда унинг бошқарувини қўлга олиш катта масъулият, демакдир. Жамоада Мессининг катта ойлик олишини тушуниш мумкин. Аммо бир қатор фойдасиз футболчилар ҳам миллион-миллион маош олади. Трансфер сиёсатини тартибга солиш ҳам муҳим. Сўнгги йилларда амалга оширилган харидларнинг ҳеч бирини жамоа учун фойдали, деб бўлмайди. Баъзи яхши савияли футболчилар эса анча қимматга олиб келинган.

Мессининг жамоада қолиш эҳтимоли қанча?
Месси йил бошида “Goal.com” сайтига берган интервьюсида клубни тарк этиш учун ўз шартномасида кўрсатилган 700 миллион еврони ҳам тўлашга рози бўлганини айтиб берган эди. У Бартомеу олиб бораётган ғирром сиёсатдан чарчагани ва ортиқ жамоа муаммоларига жавоб беришни хоҳламаслигини билдирганди.
“Мен жамоадан кетишни истаганим рост, сабаби, фаолиятимнинг сўнгги йилларини анча бахтли тасаввур қилардим. Сўнгги даврда клубда хурсандчилик кўрмай қўйдим.
У фикридан қайтганми ёки йўқ, буни ҳозир била олмаймиз. Бугунги иқтисодий қийин шароитда Мессининг ҳозирги шартнома шартлари ҳам “Барса”га оғирлик қилади. Бироқ, Лапорта олдида энди ҳар қандай молиявий имкониятларни четга суриб қўйиб, Леони жамоада олиб қолиш масаласи туради. У дарҳол ишни шу масалани ҳал этишдан бошлаши зарур. Сайлов бўлиб ўтаётган пайтда у бу ҳақида: “Агар бугун сайловда муваффақиятга эришсам, эртагаёқ Хорхе Мессига қўнғироқ қиламан”, - деди. Шунингдек, унинг фикрича, агар Жоан сайловда ғалаба қозонмаса, Мессининг клубни тарк этиши аниқ бўлиб қолади.

Лапорта мураббийни алмаштирадими?
Бугунги кунда Мессининг жамоада қолиши энг катта масала эканлиги бор гап. Аммо яна бир муаммо борки, уни ҳам ҳал этиш кун тартибидаги энг муҳимларидан бири бўлиб турибди. Рональд Куман “Барселона” мураббийи сифатида сақлаб қолинадими? Сайловдан олдин тарқалган хабарларга кўра, Жоан Куман номзодига энг бошидан қарши бўлган ва ҳозирда ҳам жамоа кўрсатаётган натижалардан қониқиш ҳосил қилмаяпти. Европа нашрлари янги президент жамоага Микель Артетани олиб келмоқчи эканини хабар қилганди. Ҳозирча, бу шунчаки миш-миш мақомидаги овозалар. Унга жиддий тус беришга асос ҳам йўқ. Сабаби, ҳар иккала мураббийнинг ўз клублари билан узоқ йиллик шартномалари бор. Артета эса, “Арсенал” лойиҳасини бу тахлит ташлаб кетмаслиги аниқ.

Абдулвосид Валихонов тайёрлади