Каннаваро мундиалдан кейин илк бор Ўзбекистонга келди

Ўзбекистон миллий терма жамоаси бош мураббийи Фабио Каннаваро 2026 йилги жаҳон чемпионати якунланганидан сўнг илк бор Тошкентга қайтди.

Аввалроқ Ўзбекистон футбол ассоциацияси биринчи вице-президенти Равшан Эрматов италиялик мутахассис июль ойининг охирида мамлакатга қайтиши кутилaётганини маълум қилган эди. Каннаваро 30 июль куни Ўзбекистон пойтахтига етиб келди.

Жаҳон чемпионатида Ўзбекистон терма жамоаси иштирокини якунлаганидан сўнг бош мураббий жамоа билан бирга Тошкентга учмаганди. 

АҚШдан у тўғри Италияга йўл олди ва узоқ давом этган йиғинлар ҳамда мусобақадан сўнг қисқа таътилни ўша ерда ўтказди.

Эндиликда Каннавародан миллий терма жамоани 2027 йилда бўлиб ўтадиган Осиё кубогига тайёрлаш ишларини давом эттириши кутилмоқда. 52 ёшли мураббийнинг Ўзбекистон футбол ассоциацияси билан тузган шартномаси 2027 йил октябригача амал қилади.

Эслатиб ўтамиз, ўз тарихида илк бор жаҳон чемпионатида иштирок этган Ўзбекистон терма жамоаси гуруҳ босқичидан чиқолмади. Жамоа Колумбияга 1:3, Португалияга 0:5 ва ДР Конго термасига 1:3 ҳисобида мағлубиятга учради.