Кейинги истеъфо – Рубен Аморимми?

Англия Премьер-лигасида мураббийларни истеъфога чиқариш одатий ҳолга айланиб қолган. “Челси”дан кетказилган Энцо Марескадан кейин истеъфога чиқарилиши мумкин бўлган кейинги номзод Рубен Аморим бўлиши мумкин.

“Манчестер Юнайтед”нинг аввалги мавқеини тиклашга уринаётган бош мураббийи Рубен Аморим клуб раҳбарияти билан муносабатларда ихтилофлар мавжудлигига ишора қилди.

Аморим клуб раҳбарияти жамоани ўзи тарғиб қилаётган 3-4-3 схемасига тўлиқ ўтказиш учун клуб раҳбарияти катта маблағ сарфлашга тайёр эмаслигини билдирган эди.

- Менда шундай ҳис борки, идеал 3-4-3 учун бизга жуда кўп пул керак, шунингдек, вақт ҳам зарур. Мен аста-секин бунинг амалга ошмаслигини тушуна бошладим. Шунинг учун, эҳтимол, менга мослашишга тўғри келади, - деди Рубен Аморим.

Рубен Аморим ўзининг иш берувчи раҳбари, яъни клуб спорт директори Жейсон Уилкокс билан муносабатлари ҳақида ҳам фикр билдиришни истамади.

- Мен бу ҳақда гапиришни истамайман. Мен аввал айтган ўз сўзларимдан афсусланмайман. Лекин бу ҳақда гапиришни хоҳламайман, - деди Аморим журналистлар билан суҳбатда.