“Кичик Месси” Манчестер клубидан ўзини зудлик билан қўйиб юборишни талаб қилди

“Манчестер Юнайтед”нинг энг истиқболли ёш футболчиларидан бири Жей-Жей Габриэль кутилмаганда клубдан кетишга рухсат беришни талаб қилди.

“Кичик Месси” лақаби билан танилган 15 ёшли Габриэль ўтган мавсумда “Юнайтед” U-18 жамоаси сафида 20 дан ортиқ гол урган эди. Англиялик ҳужумчи жорий мавсум асосий жамоада дебют қилиши кутилганди.

Бироқ The Telegraph маълумотига кўра, Габриэль клубдаги фаолиятини давом эттириши хавф остида қолган. Бунга ёш футболчининг клубга расмий билдиришнома юбориб, рўйхатдан чиқарилиш ва дарҳол эркин агентга айланиш истагини билдиргани сабаб бўлган.

“Юнайтед” бу қарордан қаттиқ ҳайратда қолган, чунки клуб футболчига катта умид боғлаган эди.

Габриэль ҳозирча янги клубини танламаган, аммо 11 ёшидан буён тизимида бўлган “Юнайтед”ни тарк этишга қатъий қарор қилган. Шу билан бирга, клуб апелляция бериш ҳуқуқидан ҳали фойдаланиши мумкин.

6 октябрь куни Габриэль 16 ёшга тўлади ва шундан кейин стипендия шартномасини имзолаши мумкин бўлади. Футболчилар профессионал шартномаларни 17 ёшдан имзолашлари мумкин.

Ўтган йили Габриэлни “Манчестер Сити” ўз сафига оғдиришга уринган эди. Шунингдек, Жей-Жейга “Арсенал”, “Реал”, “Барселона” ва “Бавария” клублари ҳам қизиқиш билдирган.