Кимнинг трансфери кўпроқ терма жамаога наф келтиради? Легионерга айланган футболчиларимиздан иборат ТОП 7!

Осиё кубогидан сўнг, бир нечта футболчиларимиз легионер мақомида бошқа жамоаларга кўчиб ўтганидан хабарингиз бор. Бугун, улар орасидаги энг катта еттита трансферни танлаб олдик. Сезиб турганингиздек, легионерга айланган ТОП 7 футболчимиз ҳақида сўз боради. Ўринларни белгилашда футболчининг каръерасида ўсиши учун ёрдам бериш эҳтимоли юқори бўлган трансферларга эътибор қаратилди. Яъни, футболчи янги даражага кўтарилиши қай даражада эҳтимоли юқори бўлса, рўйхатдаги ўрни ҳам шу қадар баланд бўлади! Шу боис, сиз кутган футболчи рўйхатимизда ёки сиз тахмин қилган ўринда бўлмаслиги мумкин.

7 ўрин. Азизбек Амонов - "Хор Факкан"

Кучли еттиликни яқиндагина Бирлашган Араб Амирликлари клуби саналган "Хор Факкан"га кўчиб ўтган Азиз Амонов очиб беради. Осиё кубогида бирор дақиқа ўйинда иштирок этмаган ҳужумчи "Насаф" билан мавсумнинг иккинчи қисмида яхшигина фурор кўтаришни уддалади. Айниқса, "Ас Садд" билан Қаршидаги драмада бош ролни ижро этгани кўпчиликнинг ёдидан кўтарилгани йўқ. ОЧЛдаги ишончли ўйини сабабли "Хор Факкан" эътибор марказига тушган ҳужумчи қишки трансфер ойнаси очилиши билан БААга эркин агент мақомида йўл олди. Қувонарлиси шундаки, Эрондаги бироз омадсиз иштирокдан сўнг, Азиз Қаршида каръерасини қайта ишга туширди, замонавий тилда айтганда "рестарт" бериб юборди. Юқори тезлик ва катта номлар тўп сурувчи чемпионат ва легионерлик уни футболчилик даражасини бир поғона кўтарилишига туртки бўлишидан умидвормиз.

6 ўрин. Икром Алибоев - "Сеонгнам"

Икром Алибоевни бу рўйхатдан ўрин эгаллаши кўпчиликни хайрон қолдириши мумкин, аммо тушунтириб бераман. Қишки трансфер ойнаси очилиши билан Жанубий Кореяда фаолият олиб бораётган легионеримиз билан бир нечта ўзбек клублари жиддий қизиқиш билдирди. Икром таклифларга қарамай, ортга қайтиб кетди ва кўп ўтмай "Сеонгнам" билан контракт тузди. Универсал ярим ҳимоячи Жанубий Корея футболидаги тезлик ва темп ўзини доим тонусда ушлаб туришини сезган бўлса, не ажаб.

5 ўрин. Жалолиддин Машарипов - "Истиқлол"

Жанубий Кореядан, энди Эрон томонларга ўтамиз. Осиё кубогида терма жамоа сардори сифатда ҳаракат қилган Жалолиддин Машарипов сўнгги соатларда Наманганга кетаётган самолётни Теҳрон томонга буриб юборди. Бу қарор, Машариповнинг Осиё қитъасидаги мавқейини сезиларли даражада кўтаргани рост. Сўнгги 2 мавсум давомида жуда кам ўйинлардан иштирок этгани ва Грециядаги иқлим билан муаммолар сабабли Жалолиддин ўз спорт формасини 100 фоиз тиклаб олганича йўқ. "Истиқлол"да ўйин амалиётига эга бўлса, Машарипов руҳан ва жисмонан терма жамоага кучлироқ бўлиб қайтиши аниқ.

4 ўрин. Остон Ўрунов - "Персаполис"

Остон Ўруновда вазият бироз бошқачароқ. "Навбаҳор"даги "бомба" мавсумдан сўнг, вингер Осиё кубогига ташриф буюрди ва кўпчилик тахмин қилганидек голларни қалаштириб ташлагани йўқ. Боз устига, у билан қизиқиш билдирган клублар билан бўлган музокараларни аксари боши берк кўчага кириб қолди. Натижада, ОК якунлашини арафасида футболчида қолган вариантлар ичида энг оптимал вариант - Эроннинг "Персаполис" клуби бўлиб қолди. Натижада, Остон Ўрунов Суперлигага қайтишдан кўра курашларга бой, интенсив форс биринчилигини танлади.

3 ўрин. Отабек Шукуров - "Кайсариспор"

Отабек борасида вазият бироз бошқачароқ. "Фотиҳ Карагюмрук" аъзоси жамоаси билан хайрлашгач, Осиё кубогига ташриф буюрди ва барча ўйинларда ўзига билдирилган ишончни тўлиқ оқлади. Унда, ўзи учун қулай ва ўрганган БАА клубларидан молиявий яхши таклифлар бўлишига қарамай, Шукуров футболни танлади ва Туркияда қолишга қарор қилди. Натижада, кўп ўтмай "Кайсариспор" билан шартнома имзолади. Туркия Суперлигасининг ўртамиёна клуби саналган жамоада Шукуров ўз спорт формасини ушлаб туришни ва ЖЧ сарлаш ўйинларида терма жамоага ёрдам беришга шай ҳолатда бўлиши кишини хурсанд қилади.

2 ўрин. Азиз Турғунбоев - "Сивасспор"

Сречко Катанецнинг ўзига хос Жокер қартасига айланган Азиз Турғунбоев учун ҳам маҳаллий грандлар охиригача кураш олиб борди. "Нефтчи", "Навбаҳор" қанча ҳаракат қилмасин, якунда Азиз фаолиятида илк бор легионер бўлишни афзал кўрди. Катта эҳтимол билан, Турғунбоев футболчи сифатида янада ўсишни истади ва Туркиянинг "Сивасспор" клубига йўл олди. 29 ёшли универсал футболчи учун Туркия биринчилиги янги имкониятлар эшигини очиб беришига умид қиламиз.

1 ўрин. Муҳаммадали Ўринбоев - "Брентфорд"

"Туманли Альбион"га кўчиб ўтган биринчи ўзбек футболчиси - Муҳаммадали Ўринбоев ТОП 7 ликнинг биринчи поғонасини банд қилгани бежиз эмас. Бу ёш иқтидор эгаси учун SPORTS.uz томонидан берилган кичик аванс ўрнида қабул қиласиз!

"Брентфорд"нинг ёшлар жамоаси сафида Девид Бэкҳамнинг ўғли билан машғулотларда иштирок этаётган ҳужумкор ярим ҳимоячи тез орада АПЛда кўриниш бермаслиги мумкин. Балки, бу мавсум асосан ёшлар жамоасидаги ўйинлари билан ишқибозларни хурсанд қилар. Буниси муҳим эмас. Асосийси, у ўзи учун, тенгдошлари ва келажакдаги ёш футболчиларимиз учун АПЛга йўл очишни уддалади. "Брентфорд" жамоаси уни ёшлар ўртасидаги турли ҳил мусобақаларда кузатган ва келажак проекти сифатида таркибга қўшиб олган. Клуб скаутлари Муҳаммадалида 2-3 мавсумда бемалол асосий жамоа даражасига чиқишга етарли потенциални кўргани учун ҳам 100 дан ортиқ вариантлар орасида танлаб олишган. Тинимсиз меҳнат ва гўзал сабр уни ўзи истаган мақсадига эришиши учун ёрдам беришидан умидимиз бор.

Яҳёхўжа Улуғхўжаев.

Бу муаллифнинг субъектив фикри. Агар сизнинг "ТОП 7"лигингиз бошқачароқ кўринишда бўлса, уни комментда ёзиб қолдиринг!