Левандовски Европа клубидан яна таклиф олди

“Барселона” билан амалдаги шартномаси якунланиб бораётган 37 ёшли Роберт Левандовскига Туркиянинг яна бир қудратли клуби “Фенербаҳче” эиддий қизиқиш билдирмоқда.

Бир неча манбаларнинг ёзишича, тажрибали форвардни олиш мақсадида турк клуби “Барселона”га расмий таклиф юборган.

Маълумотларга кўра, “Фенербаҳче” польшалик ҳужумчининг шартномаси якунланишига ярим йил қолганига қарамай, уни қишки трансферлар вақтида олиш учун Каталония клубига 10 миллион евро миқдорида бадал пули таклиф қилди.

“Барселона” мутасаддилари ҳали бу таклиф бўйича якуний қарор қабул қилмаган.

Шу ўринда, Левандовскининг ўзи “Барселона”да қолиш истагини билдираётганини таъкидлаш лозим. Роберт Каталонияда яна бир йил қолиш учун ҳозир олаётган 33,3 миллион евро миқдоридаги йиллик маошининг катта қисмидан воз кечишга тайёр.

Жорий мавсумда Роберт Левандовски барча мусобақаларда 17 та учрашувда иштирок этиб, 8 та гол уриб, 2 та голли узатма амалга оширган.