Левандовски Роналду ва Мессининг ортидан кетяпти

“Барселона”нинг 37 ёшли польшалик ҳужумчиси Роберт Левандовски Европа топ-чемпионатларида XXI асрда фақат Лионель Месси ва Криштиану Роналду қўлга киритган тарихий ютуқни такрорлади. Бу ҳақда Opta Sport статистик портали хабар берди.

Испания чемпионатининг 23-турида каталонияликлар ўз майдонида “Мальорка”ни 3:0 ҳисобида мағлубиятга учратди. Голлар Роберт Левандовски, Ламин Ямал ва Марк Берналь ҳисобига ёзилди.

Статистика экспертлари тақдим қилган маълумотга кўра, Левандовски 2025/2026 йилги Ла Лига мавсумида 10 та гол урди ва шу тариқа XXI асрда Европанинг беш етакчи чемпионатида кетма-кет 15 мавсумда икки хонали голлар сонига етиб борган учинчи футболчига айланди.

Бунгача бундай натижани фақат Криштиану Роналду (16 мавсум) ва Лионель Месси (15 мавсум) қайд этган. Роналду Англия Премьер-лигаси (“Манчестер Юнайтед”), Ла Лига (“Реал”) ва А Серияда  (“Ювентус”)да, Месси эса Франция (“Пари Сен-Жермен”) ва Испания (“Барселона”) чемпионатларида бундай ютуққа эришган.

Левандовски 2022 йил ёзидан бери “Барселона” сафида ўйнаб келмоқда. У илгари Бундеслигада “Бавария” ва “Боруссия Дортмунд” жамоаларида ҳам тўп суриб, голлар урган.

Жорий мавсумда польшалик форвард барча мусобақаларда 28 та ўйинда иштирок этиб, 13 та гол ва 3 та голли узатма муаллифи бўлган.