“Ливерпуль”нинг 50 миллион фунтлик таклифи ерда қолди

“Кристал Пэлас” раҳбарияти “Ливерпуль” клубининг қанот ҳужумчиси Исмаила Саррни сотиб олиш учун берган 50 миллион фунтлик (58 миллион евро) таклифини рад этди.

Бу ҳақда журналист Фабрицио Романо X ижтимоий тармоғида маълум қилди.

Инсайдер маълумотига кўра, Лондон клуби ушбу трансфер ойнасида африкалик вингерни сотиш ниятида эмас. Бунгача ҳам “Кристал Пэлас” футболчини сотиб олиш бўйича Туркиянинг “Галатасарой” клубидан келган икки таклифни рад этган.

Сарр ўтган мавсумда “Кристал Пэлас” сафида барча мусобақаларда 45 та ўйинда иштирок этган. У 21 та гол ва 2 та голли узатма қайд этган.

Футболчининг клуб билан амалдаги шартномаси 2029 йил ёзигача амал қилади.

Transfermarkt портали маълумотига кўра, футболчининг бозор қиймати 45 миллион еврони ташкил этади.