“Ливерпуль” 2019 йилдаги трансфер учун “Фулхэм”нинг ҳақини охиригача тўламагани аниқланди.

Маълумотларга қараганда, ливерпулликлар “Фулхэм”дан 16 ёшли ярим ҳимоячи Харви Эллиоттни олган. Томонлар компенсация миқдори бўйича келишувга эриша олмаган. “Фулхэм” 10 миллион фунт талаб қилган, “Ливерпуль” эса атиги бир миллион берган.

Харви Эллиотт трансфери бўйича ишни Профессионал футболнинг компенсациялар бўйича қўмитаси кзриб чиқди ва ливерпулликлар томонидан тўланиши керак бўлган суммани белгилаб берди. Унга кўра, “Ливерпуль” раҳбарияти “Фулхэм”га зудлик билан 1,2 миллион фунт тўлаб бериши керак.

Эллиоттнинг кейинги икки профессионал шартномасидан “Фулхэм” яна 500 минг фунт олади. Агар футболчининг ўйини очилиб кетса, унинг собиқ жамоаси яна 2,3 миллион фунтгача бонус пулларига эга бўлади.

Энг муҳими, агар “Ливерпуль” бу футболчини бошқа клубга трансфер қиладиган бўлса, умумий сумманинг 20 фоизи “Фулхэм” ҳисобига ўтказилади.

Харвининг ўзи мавсумни ижара асосида “Блэкберн” клубида ўтказмоқда. Ёш футболчи Чемпионшипда жами 22 та ўйин ўтказиб, тўртта гол урди ва саккизта голи пас оширди.