Луис Энрике: Ҳаммангизни алдадим...

Франция чемпионатининг 25-турида ПСЖ сафар учрашувида “Ренн” жамоаси устидан 4:1 ҳисобида ғалаба қозонди.

Бу ғалабадан кейин Луис Энрике шогирдлари навбатдаги чемпионликка яна бир қадам яқинлашди. Айни пайтда пойтахтликлар 65 очко жамғарган ҳолда, мусобақа жадвалида энг яқин таъқибчиси “Марсель”дан 16 очкога ўзиб кетган.

Беллашувдан кейин Луис Энрике асосий эътибори Чемпионлар лигаси нимочрак финалида “Лиерпуль”га қарши бўладиган жавоб ўйинига қаратилганини тан олди.

- “Ренн”га қарши ўйин олдидан “Ливерпуль” билан бўладиган учрашув ҳақида ўйламаяпман, деганимда, ҳаммангизни алдаган эдим. Буни ўйламай бўладими?

Мен қуръа натижаси эълон қилинганидан кейин ҳар доим “Ливерпуль” ҳақида бош қотиряпман. “Ренн”га қарши яхши ўйнадик. “Ливерпуль”га қарши бўладиган баҳсгача мана шу жиддий иштиёқимизни сақлаб қолишимиз керак, - деди Луис Энрике.

Эслатиб ўтамиз, Парижда бўлган биринчи учрашувда майдон эгалари ўйин бобида англияликлардан ҳар томонлама устунлик қилди, бироқ “Ливерпуль” битта гол билан ғалабани илиб кетди.

Энди жавоб баҳси 11 март куни “”Энфилд” аренасида бўлади.