"Мағлубиятни тасаввур ҳам қила олмасдим, вақт ўтиши билан нима қилганимизни тушуниб етдим" - Кубокни ютган "Андижон" дарвозабони яна нималарни айтди?

Бир неча мавсумдан буён “Андижон” дарвозасини қўриқлаб келаётган Элдор Адҳамов ҳам Ўзбекистон Кубоги финалида муносиб ўйин намойиш қилди. Гарчи у ўша куни ўз дарвозасидан иккита тўп олиб чиққанига қарамасдан, “Андижон”ни бир қатор голлардан қутқариб қолган ҳолда ишончли ўйин кўрсатди. Унинг ҳам орзуси, истаги “Андижон” билан бирга Кубокни ютиш эди ва ниҳоят дарвозабон ўзининг эзгу мақсадига эришди.

“Андижон”нинг ғалабасини ҳамма жойда алоҳида эътироф қилишмоқда. Бугун эса айнан Элдор Адҳамов билан мулоқотга киришамиз. Дарвозабон клуб матбуот хизматига дастлаб финалга тайёргарлик қандай бўлгани хусусида тўхталди.

“Кубок финалига “Нефтчи”га қарши баҳсдан сўнг вақтлироқ йиғилиб, тайёргарлигимизни бошлагандик. Мураббийлар руҳан, жисмонан ва тактик жиҳатдан иш олиб боришди. Биз ҳам ўртада жуда катта нарса борлигини тушуниб тургандик. Бу футболчининг фаолиятига таъсир қиладиган ҳолат, Осиё Чемпионлар лигасига йўлланма ва Суперкубокда ўйнаш имкониятини берувчи ҳамда “Андижон”ни 60 йиллигига совға қилиш...Булар ҳақида биз тинмасдан ўйладик. Шахсан мени ўйиндан олдинги фикру-хаёлларим фақат ғалабага қаратилганди. Мағлубият ҳақида тасаввур ҳам қила олмасдим. Ғалабадан кейинги ҳолатлар ҳаёлимга келаверди. Худо ниятимизга етказди. Меҳнатимизга яраша тарихда биринчи марта Кубокни қўлга киритдик”.

“Андижон” жамоасининг тарихда илк бор Кубокни боши узра кўтаргани бу футболимиздаги муҳим воқелик, албатта. Чунки “Бургутлар” тўла муносиб эдилар ва бунга ҳақли равишда эришдилар. Хўш, нимани эвазига ютди? Адҳамов бу борада шундай деди:

“Нимани эвазига ютдик? Авваламбор, омад биз томонда бўлди. Кўп йиллардан бери ишлаб келинаётган услубларимиз ўша куни ўхшади. Бошқа учрашувларда шу нарсалар амалга ошмай қолаётганди. Сергей Лушчанни қанақа мураббийлигини билардик. Ҳужумкор футбол ўйнайди. Биз шунга қараб тайёрлангандик. Стандарт вазиятлар, қарши ҳужумлар, ҳимоядаги ишончли ўйин – ҳамма-ҳаммаси ғалабамиз омили бўлиб хизмат қилди. Мухлисларимизга эса гап-сўз бўлиши мумкин эмас. Улар стадионда “даҳшатли” муҳитни яратдилар ва бу бизга куч берди.

Биласиз, ўйиннинг қўшимча вақтлари “ёниб” кетди.  Чунки бу жуда муҳим палла эди ва “Андижон” қўшимча вақтларда ҳам характер намойиш қила олган ҳолда қаҳрамонлик кўрсатди. Буни оддий сўз билан таърифлаш қийин. Элдор эса қўшимча вақтларни ҳам ёдга олди.

“Қўшимча вақтларда бизда янада ишонч пайдо бўлганди. Яъни, бугун ютиб кетамиз, деган қатъий ишончимиз бор эди. Кубокни кўтарганимизда дарҳол тушунмадим. Кейинчалик вақт ўтиши билан секин-аста нима қилганимизни тушуниб етдим. Ўша пайтни ўзида эса бирданига барчасини ҳис қила олмадим.”

Шунингдек, Адҳамов Кубок финалидан аввал “Андижон”нинг чемпионат доирасида “Нефтчи”га қарши беллашувида ўзининг “Бургутлар” таркибидаги 60-ўйинини ўтказишга муваффақ бўлди. Ўз навбатида дарвоазабон ушбу статистик кўрсаткичга ҳам тўхталди.

“Нефтчи”га қарши финалдан олдинги учрашувимиз менинг “Андижон” сафидаги 60-юбилей ўйинимга айланди. Тўғриси, мени ҳам бундан хабарим йўқ эди. Худога шукр, ўша учрашувда дарвозамиз дахлсизлигини сақлаб қола олдик. Бу даражагача етиб келишим осон бўлмаган. Ўша пайтдан бери жамоада мен билан бирга бўлиб келаётган шахслар билади. Худо хоҳласа, бундан кейин ҳам “Андижон”нинг ғалабаларига муносиб ҳисса қўшиш йўлида бор имкониятимизни ишга солишда давом этамиз”.

“Андижон” клуби эндиликда бор эътиборини яна миллий чемпионатга қаратган. Жамоа аъзолари 19 октябрь куни “Металлург”га қарши бўладиган учрашув учун тайёрланмоқда.

“Кубок ўйинидан кейин икки кун дам олиб 8 октябрдан “Металлург”га қарши ўйин учун Тошкентда машғулотларимизни бошлаганмиз. Ҳаммаси яхши, режа бўйича кетяпти”, - деди Элдор Адҳамов.