Максим Шацких Кубок финалида кимнинг ғалабасини хоҳлаяпти?

Бугун Бухорода Ўзбекистон Кубоги финалини кўрамиз. Майдонда “Насаф” ҳамда “Навбаҳор” тўқнаш келар экан, ўйин қандай ўтишини ўзингиз тасаввур қилиб кўраверинг, боз устига бу Кубок финали бўлса!

Ҳар доим финалларда кўришга одатланиб қолганимиз – “Пахтакор” бу сафар финал майдонида бўлмайди. Ярим финалда “Навбаҳор”га мағлубиятга учраганини яхши биласиз. Шу сабабли улар учрашувни четдан кузатишга мажбур.

Финал олдидан “Пахтакор” бош мураббийи Максим Шацкихнинг фикрларини эшитиш қизиқ эди. Шу боис Максим Александрович Sports.uz учун қисқача ўз фикрларини айтиб ўтди.

“Бугунги финалда иккала жамоанинг имкониятларини тенг баҳолайман 50х50. Мен кимнинг ғалабасини хоҳлайман? Иккаласининг. Чунки “Насаф” ҳам, “Навбаҳор” ҳам кучли рақиблар. Ўйин тақдирини бир-иккита футболчи эмас, бутун жамоа ҳал қилади. Менга ҳам ҳаммаси қизиқ. Аммо учрашув тақдири асосий вақтда ҳал бўладими ёки пенальтилар сериясидами, тахминларни айтишга одатланмаганман”, - дейди Шацких.