Maksim Shatskix Kubok finalida kimning g‘alabasini xohlayapti?

Bugun Buxoroda O‘zbekiston Kubogi finalini ko‘ramiz. Maydonda “Nasaf” hamda “Navbahor” to‘qnash kelar ekan, o‘yin qanday o‘tishini o‘zingiz tasavvur qilib ko‘ravering, boz ustiga bu Kubok finali bo‘lsa!

Har doim finallarda ko‘rishga odatlanib qolganimiz – “Paxtakor” bu safar final maydonida bo‘lmaydi. Yarim finalda “Navbahor”ga mag‘lubiyatga uchraganini yaxshi bilasiz. Shu sababli ular uchrashuvni chetdan kuzatishga majbur.

Final oldidan “Paxtakor” bosh murabbiyi Maksim Shatskixning fikrlarini eshitish qiziq edi. Shu bois Maksim Aleksandrovich Sports.uz uchun qisqacha o‘z fikrlarini aytib o‘tdi.

“Bugungi finalda ikkala jamoaning imkoniyatlarini teng baholayman 50x50. Men kimning g‘alabasini xohlayman? Ikkalasining. Chunki “Nasaf” ham, “Navbahor” ham kuchli raqiblar. O‘yin taqdirini bir-ikkita futbolchi emas, butun jamoa hal qiladi. Menga ham hammasi qiziq. Ammo uchrashuv taqdiri asosiy vaqtda hal bo‘ladimi yoki penaltilar seriyasidami, taxminlarni aytishga odatlanmaganman”, - deydi Shatskix.