"Man of the match" - Суперлиганинг 20-турида энг яхшилар кимлар?

Супрелиганинг 20-тури ҳам якунланди. Голларга бой ўтган ўйинларда ўзини кўрсатган ва жамоасининг ғалабаларига муҳим роль ўйнаган футболчилар кўзга ташланди. Қуйида шу хусусида сўз юритамиз.

“Металлург” – “Андижон” – 2:0. Ўйиннинг энг яхши футболчиси – Забиҳилло Ўринбоев

Бугунги кунга келиб “Металлург”нинг муҳим фигурасига айланган Забиҳилло Ўринбоев навбатдаги учрашувда ҳам фаоллиги билан ажралиб турди. Бу ҳолат “Андижон”га қарши баҳсда ҳам сезилиб турди. Гарчи Забиҳилло гол урмаган бўлса-да, жамоасининг юрагига айланган ва ҳар бир ҳужумида ўзи иштирок этди, рақиб ҳужумларини бартараф этишда ҳам ҳимоячиларга ёрдамлашди. Майдонда катта ҳажмдаги ишни бажарди. Ғалабага қўшган ҳиссаси катта бўлди. У ҳақли равишда энг яхши футболчига айланди.

“Нефтчи” – “Бухоро” – 3:0. Ўйиннинг энг яхши футболчиси – Гиорги Никабадзе

“Нефтчи”нинг “Бухоро”га қарши учрашувида фарғоналикларнинг грузиялик ҳужумчиси Гиорги Никабадзе қисқа вақт ичида дублни расмийлаштириб қўйди. У ўзига билдирилган ишончни оқлаяпти, мухлислар ҳам Никабадзедан мамнунлар. Мураббийлар ҳужум чизиғида Табатадзенинг ўрнига муносиб ўйинчи топишгани кўриниб турибди.

“Олимпик” – “Насаф” – 1:3. Ўйиннинг энг яхши футболчиси – Азизбек Амонов

“Насаф” клуби Тошкентда қимматли уч очкони қўлга киритди. Бунда “Насаф”нинг ҳужумчиси Азизбек Амоновнинг ҳиссаси катта бўлди. У 25-cониядаёқ гол уриб мавсумдаги энг тезкор гол муаллифи бўлди. У гол уришдан ташқари ассист вазифасини бажарди ва пенальти ҳам ишлади.

“Навбаҳор” – “Турон” – 5:0. Ўйиннинг энг яхши футболчиси – Остон Ўрунов

Ниҳоят, чемпионлик йўлида курашаётган “Навбаҳор”нинг ғалабасиз серияси барҳам топди. Аутсайдер “Турон”га қарши учрашувда наманганликлар бор аламини олишди, чоғи. Чунки рақиб дарвозасига жавобсиз 5 та гол урдилар. Шундан иккитаси Остон Ўруновга тегишли бўлди. У икки марта пенальтидан гол урди. Бундан ташқари, яна фаоллиги билан ажралиб турди. Бир сўз билан айтганда, Остон одатдагидек майдонда ўз ишини қилди.

“Пахтакор” – ОКМК – 2:2. Ўйиннинг энг яхши футболчиси – Ҳожиакбар Алижонов

“Пахтакор”нинг қанот ҳимоячиси жорий мавсумни юқори нотада ўтказаётгани эътиборга молик. Шунинг учун уни учрашувнинг энг яхши футболчиси, дея эътироф этилаётгани бежизга эмас. Алижонов 20-турда жамоасининг ОКМКга қарши баҳсида ҳам яна энг яхшисига айланди. Ҳожиакбар ўз қанотида Ўзбекистонда энг яхшиларидан бири.

“Бунёдкор” – “Сурхон” – 0:1. Ўйиннинг энг яхши футболчиси – Бобур Асқаров

“Сурхон”га қойил. Бу клуб яқинда Ўзбекистон Кубоги доирасида Тошкентда “Бунёдкор”ни ютганди. Бу сафар Суперлига баҳсида ҳам ушбу рақибини тиз чўктиришга муваффақ бўлди. Беллашувнинг энг яхши футболчисига айланган Бобур Асқаров эса ҳаммасини ҳал қилди. У 73-дақиқада захирадан майдонга тушди ва 85-дақиқада ягона голни уриб, “Сурхон”га жуда муҳим ғалабани тақдим қилди. Асқаров бўлмаганида “Сурхон” балки ютолмаслиги мумкин эди.

“Қизилқум” – “Сўғдиёна” – 4:2. Ўйиннинг энг яхши футболчиси – Ислом Кенжабоев

Суперлигада қолиш учун астойдил курашаётган “Қизилқум” бу йўлда навбатдаги қимматли ғалабасини қўлга киритди. Навоийда “Сўғдиёна”га қарши учрашувда мезбонлар мухлисларини хурсанд қилди. Доимгидек, жамоа етакчиси Ислом Кенжабоев яна энг яхшисига айланди. У бутун учрашув давомида тиним билмади ва ўзи ўйинга нуқта қўювчи гол муаллифига айланди. Кенжабоевнинг борлиги “Қизилқум”нинг асосий ютуқлардан бири.

Шуҳратбек Жўраев.