"Манчестер Сити" ҳимоячининг маошини оширади
Яхши хабар
«Манчестер Сити» клуби португалиялик Маттеуш Нуньеш билан янги уч йиллик шартнома борасида келишувга яқин. Бу ҳақда Manchester Evening News нашри хабар берди.
Манба маълумотига кўра, футболчининг ҳафталик маоши 20 минг фунтга оширилиб, бонусларсиз 150 минг фунтни ташкил этади. Ҳозирда амал қилаётган шартнома 2028 йил ёзигача мўлжалланган.
Маттеуш Нуньеш 2023 йил ёзида «Вулверхэмптон» клубидан «Манчестер Сити» сафига 62 миллион евро эвазига ўтган эди. Дастлабки мавсумида у асосий таркибда бор-йўғи етти ўйинни бошлаб берди, асосан ярим ҳимояда ҳаракат қилди. 2025 йилда Кайл Уокер жамоани тарк этганидан сўнг, Нуньеш позициясини ўзгартириб, ҳимоянинг ўнг қанотида ўйнай бошлади. Ўтган мавсумда у шу вазифада мустаҳкам ўрин эгаллаб, 32 бор майдонга асосий таркибда тушди.
Мадриднинг «Реал» клуби қизиқишига қарамасдан, «Манчестер Сити» португалиялик футболчини жамоада сақлаб қолиш ниятида. Ҳозирда Нуньеш жароҳатдан кейин тикланиш жараёнини ўтказмоқда.
Шартнома узайтирилиши клубга нисбатан молиявий қоидаларни бузиш иши бўйича олиб борилаётган текширувлар фонида содир бўлмоқда. Ушбу иш доирасида «Манчестер Сити»га жиддий жазолар, жумладан очколарни камайтириш каби санкциялар қўлланилиши эҳтимоли бор.
Изоҳлар (0)