“Манчестер Сити" ҳимоячиси финалда ўйнамайди

"Манчестер Сити" ҳимоячиси Марк Гехи Англия Лига кубоги финалида ўйнай олмайди.

"Шаҳарликлар" мусобақанинг ярим финал жавоб ўйинида "Ньюкасл"ни мағлуб этиб (3:1, биринчи ўйин - 2:0), финалга йўл олди ва у ерда "Арсенал" билан ўйнайди.

Мусобақа регламентига кўра, футболчи ўйнаш ҳуқуқини қўлга киритиш учун "қишки трансфер ойнаси ёпилгунга қадар ёки ярим финалнинг биринчи ўйинига қадар (қайси ўйин эртароқ бўлишига қараб)" клубга ўтиши керак. Гехи 19 январь куни "Ман Сити"га ўтди, "Ньюкасл" билан биринчи ўйин 13 январь куни бўлиб ўтди.

Кечаги ўйиндан сўнг "Манчестер Сити" бош мураббийи Пеп Гвардиола Гехи финалда ўйнай олмаслигидан норозилигини билдирди: "Футболчини катта пулга сотиб оласан, у эса мен тушунмайдиган қоида туфайли ўйнай олмайди."

Журналист Мартин Циглернинг ёзишича, Англия футбол лигаси (EFL) "Ман Сити"га қарши бормайди ва регламентни ўзгартирмайди. Қоидалар жорий мавсум бошланишидан олдин ҳам юмшатилган бўлиб, агар ўйинчилар ярим финалнинг биринчи ўйинига ўтса, Лига кубогида бир нечта клублар учун ўйнашга рухсат берилган.

Қайд этилишича, 9 январь куни "Борнмут"дан "Ман Сити"га ўтган Антуан Семеньо "Арсенал"га қарши ўйнаши мумкин.