“Манчестер Сити”га энг нуфузли турнирда учта гол уриш тарихда уч футболчига насиб қилган. Улар кимлар?

Европа Чемпионлар лигаси умумий босқичининг тўртинчи турида “Спортинг” ўз майдонида “Манчестер Сити”ни 4:1 ҳисобида мағлуб этди.

Учрашув қаҳрамони мезбонларнинг швециялик ҳужумчиси Виктор Дьёкереш бўлди. Унинг учта голи жамоасининг иродали ғалабасини таъминлади.

Статистика марказларининг маълум қилишича, Виктор Дьёкереш Европа Чемпионлар лигаси тарихида “Манчестер Сити” дарвозасига бир ўйинда учта тўп киритган учинчи футболчига айланди.

Бунгача “кўҳна қитъа”нинг энг нуфузли турнирида 2016 йили Лионель Месси ва 2021 йили Кристофер Нкунку “шаҳарликлар” билан ўйинда хет-трикка эришган экан.