“Манчестер Юнайтед” жамоани қутқарадиган футболчи топди

“Манчестер Юнайтед” олдинги чизиқдаги муаммоларни “Пари Сен-Жермен” ҳужумчиси Рандаль Коло Муани ёрдамида ҳал этишни режалаштирмоқда.

Transfer News Live ва Fichajes нашрининг маълум қилишича, манчестерликлар франциялик ҳужумчи учун парижликларга 70 миллион евро таклиф қилади.

Коло Муанининг ўзи ҳам Парижни тарк этишга тайёр. 25 ёшли форвард испаниялик мутахассис Луис Энрикенинг ўйин услубига мос тушмаяпти ва шу боис асосий таркибдаги жойини бой бериб қўйди.

Рандаль “Айнтрахт”да тўпурарлик маҳоратини намойиш қилганидан кейин ПСЖ уни 2023 йилнинг ёзида 95 миллион еврога трансфер қилганди.

Коло Муани аслида “Нант” тарбияланувчиси ҳисобланади. Бу жамоадан ташқари Франция чемпионатида “Булонь” шарафини ҳам химоя қилган.