“Манчестер Юнайтед”га зудлик билан Роналду керак. У таклифни қабул қилдими?

“Манчестер Юнайтед” раҳбарияти Криштиану Роналдуни қайтаришга қарор қилди.

Журналист Николо Скиранинг хабар беришича, манчестерликлар португалиялик юлдузнинг агенти Жорже Мендеш билан боғланиб, трансферни муҳокама қилишга киришган.

Роналдунинг “Ювентус” билан шартномаси 2023 йилнинг ёзида якунланади. Туринликлар уни Чемпионлар лигасида ғолиб чиқиш учун таклиф этганди. Лекин жамоа икки йилдан бери нимчорак финалдан ўтолмаяпти. Клубга эса, амалга ошмаган мақсад учун Роналдуга йилига 31 миллион евро маош тўлаш оғирлик қилмоқда.

Криштиану 2003-2009 йиллар давомида “Манчестер Юнайтед” шарафини ҳимоя қилган. Бу давр мобайнида уч марта Англия чемпиони, мамлакат кубоги ва Суперкубоги соҳиби бўлган, икки марта Лига кубогида зафар қучган. Шунингдек, Роналду манчестерликлар билан бирга Чемпионлар лигаси ва клублар ўртасидаги жаҳон чемпионатида ҳам бош совринни қўлга киритган.