Manchesterdan ikki yulduzni olamiz

Angliya Premier-ligasining oʻrtamiyona jamoalaridan hisoblangan “Everton” mavsumning ikkinchi yarmi uchun tarkibini yangi oʻyinchilar bilan kuchaytirishga qaror qildi.

Mersisaydliklar bu maqsadini amalga oshirish uchun “Manchester Yunayted”dan birdaniga ikki nafar hujumkor futbolchini taklif qilish ustidan ish olib bormoqda.

Manbalarda qayd etilishicha, “Everton” manchesterliklarning 20 yoshli yarim himoyachisi Kobbi Maynu va 24 yoshli hujumchi Joshuа Zirkzeeni yanvar oyida ijaraga olmoqchi.

Bu ikkala futbolchi ham Ruben Amorim jamoasida oʻyin amaliyoti yetishmasligidan norozi boʻlmoqda. Joriy mavsumda Maynu barcha musobaqalarni hisobga olgan holda 12 ta oʻyinda qatnashib, bir marta golli uzatma bergan. Zirkzeening hisobida ham 12 ta oʻyin va 1 ta gol bor.

“Manchester Yunayted” bosh murabbiyi Ruben Amorim jamoaning ayrim oʻyinchilari Afrika Millatlar kubogida qatnashish uchun oʻz mamlakatlari terma jamoalariga joʻnab ketgani bois, Maynu va Zirkzeening yanvarda ketishiga qarshilik qilyapti.