Манчестерликлар беш юлдуздан воз кечди

Англия премьер-лигасида мавқеини тиклаб бораётган “Манчестер Юнайтед” клуби яқинлашиб келаётган ёзда жамоадан кетиши керак бўлган беш нафар футболчини аниқлаб олди.

“Юнайтед” раҳбарияти  аллақачон ярим ҳимоячи Каземиронинг мавсум охирида тугайдиган шартномасини узайтирмаслигини тасдиқлаб бўлган. Бироқ ёзда клубни тарк этадиганлар бу билан чекланмайди.

The Sun маълумотига кўра, “Манчестер Юнайтед” хўжайинлари  дарвозабон  Андре Онана, ярим ҳимоячилар Мануэль Угарте, Мэйсон Маунт, ҳужумчилар Жошуа Зиркзее ва Расмус Хёйлундни сотиб юборишга тайёр.

Санаб ўтилган беш нафар футболчининг барчаси манчестерликларнинг собиқ бош мураббий Эрик тен Хаг даврида нидерландиялик мутахассис талаби билан олиб келинган ва улар клубга тахминан чорак миллиард фунтга тушган.

“Олд Траффорд”да ушбу футболчиларга қилинган сармояни қайтариб олишнинг имкони йўқлигини тушунишмоқда ва улар клубга келганидан арзонроқ нархга кетади.