Marko Asensioga ustozlik qilgan mutaxassis SPORTS.UZ muxbiriga: "Chempionatingizga juda qiziqib qoldim, O‘zbekistonda ishlash uchun ochiqman"

Yaqinda yurtimizda o‘tkazilgan U20 Osiyo chempionatida Ummon terma jamoasi ham ishtirok etdi. Lekin ularda guruhda qolib ketdi. E’tiborlisi, ushbu terma jamoani ispaniyalik tajribali mutaxassis David Gordo boshqarib bormoqda. 53 yoshli mutaxassis ayniqsa yoshlar bilan ishlashda katta tajribaga ega. U nafaqat Ummon U20, balki U17 va U19 terma jamoalariga ham o‘zi boshchilik qiladi.

To‘liq ism-familiyasi Xuan David Gordo Mansilya bo‘lgan bu murabbiy Ispaniyaning ham bir qator yosh toifasidagi terma jamoalarini boshqargan. Yaqinda Sports.uz jurnalisti Shuhratbek Jo‘raev ispaniyalik murabbiy bilan aloqaga chiqdi.

- O‘zbekiston o‘zi mezbonlik qiligan U20 Osiyo chempionatida g‘oliblikni qo‘lga kiritdi. Siz terma jamoamizning muvaffaqiyatini kutganmidingiz?

- O‘zbekiston yoshlar terma jamoasining o‘yinlarini ko‘rganimda va musobaqadan oldin ular bilan o‘rtoqlik uchrashuvida maydonga tushganimizdan so‘ng shu fikrga amin bo‘lgandimki, O‘zbekiston ushbu musobaqaning favoritlaridan biri!

- Terma jamoamizning jahon chempionatidagi imkoniyatini qanday baholaysiz?

- Jahon chempionatida eng kuchli jamoalar ishtirok etadi va O‘zbekiston guruh bosqichidan chiqishi uchun bor imkoniyatini ishga solishiga to‘g‘ri keladi. Agar muvaffaqiyatga erishadigan bo‘lsa, pley-off bahslarida uzoqroqqa borish imkoniyati bor. O‘zbekiston har qanday jamoaga qarshi yaxshi o‘yin ko‘rsatishi mumkin. Jamoa hech qanday havotirsiz o‘ynashi kerak va o‘z kuchiga hamda imkoniyatlariga ishonishi lozim.

- Terma jamoamiz safida ko‘proq qaysi futbolchilarning o‘yini sizga ko‘proq yoqdi?

- Men alohida futbolchilarni ajratib ko‘rsatishni yoqtirmayman. Buni samaradorlikka qarshi ish deb hisoblayman. Futbol jamoaviy sport turi hisoblanadi. Jamoalar chempionatlarni yutishadi. Lekin tan olish kerakki, O‘zbekistonda bir qator o‘ta iqtidorli o‘yinchilar bor. Ularni kelajakda yorqin karera kutib turibdi, desa bo‘ladi.

- Finalni ko‘rdingizmi?

- Ha, finalni tomosha qildim. O‘zbekiston shunchaki g‘olibligini ko‘rsatib qo‘ydi.

- Ummon terma jamoasi Osiyo chempionatida guruhda qolib ketdi. Vazifa qanday edi va jamoaga nima etishmadi, deb o‘ylaysiz?

- Ummon futbolchilari uchun bu birinchi katta saviyadagi musobaqa edi. Biroq Osiyo chempionatini Janubiy Koreyaga qarshi omadsiz o‘yin bilan boshladik. Ushbu mag‘lubiyatga o‘z xatolarimiz sabab bo‘ldi. Tojikistonga qarshi uchrashuvda bizda bir qator ajoyib imkoniyatlar bo‘lsa-da, to‘g‘risi, o‘yinni o‘z tomonimizga og‘dirib olishda qiynaldik. Hal qiluvchi vaziyatlarda xato qarorlarni qabul qildik. Qolaversa, omad etishmadi. Bu kabi faktorlar sizni g‘alaba qozonish imkoniyatingizni pasaytirib yuboradi.

- Murabbiylik faoliyatingiz haqida gapirib bersangiz.

- Men juda baxtli insonman. Kastilyada “Real” Madrid yoshlar jamoasida ishlaganman. “Leganes” va “Alkorkon”da bosh murabbiylik qilganman. Ispaniyaning turli yoshdagi yoshlar terma jamoalarida 8 yil murabbiylik faoliyatini olib bordim. Hozirda Ummon yoshlar terma jamoasini boshqaryapman. Aytib o‘tishim kerakki, ushbu faoliyatim davomida ham klub, ham milliy terma jamoalar miqyosida titullar qo‘lga kiritishga muvaffaq bo‘lganman.

- Hozirda Ummon U20 termasini boshqaryapsiz. Ungacha turli yoshdagi jamoalarga ham ustozlik qildingiz. Bosqichma-bosqich ko‘tarilayotganingizni hisobga olsak, endigi navbat milliy terma jamoa bosh murabbiyligimi?

- Ummonda U20 terma jamoasiga javobgar murabbiyman. Meni maqsadim futbolchilarning faoliyatini yanada yaxshilashga yordam berish, har bir mashg‘ulot, har bir o‘yindan keyin ularning o‘yinini yaxshiroq darajaga olib chiqish. Kelgusi ish o‘rnim qaer bo‘lishi bu faqatgina menga bog‘liq bo‘lgan narsa emas. Men o‘sish va rivojlanishga xizmat qiladigan har qanday loyihalarga ochiqman. Bor ambitsiyalarimni ishga solib mehnat qilishga tayyorman.

- Shuningdek, Ispaniyaning turli yosh toifalaridagi terma jamoalarida ham murabbiylik ishini olib borgansiz. Ayting-chi, hozirgi mashhur futbolchilarning qaysilariga ustozlik qilgansiz?

- Men juda ham baxtli insonman. Chunki ko‘plab ajoyib futbolchilar bilan ishladim. Pedri, Ferran Torres, Dani Sebalos, Rodri, Marko Asensio, Niko Uilyams, Yeremi Pino, Dani Olmo, Alexandro Balde, Valexo, Fabian Oyarsabal Mikel Merino kabi ko‘plab Ispaniyaning iqtidorli futbolchilariga murabbiylik qilganman. Aynan ularning yoshlar jamoalaridagi o‘yinlarida ustozlik qilib, faoliyat olib borganman.

- O‘zbek futboli haqida bungacha nimalarni bilardingiz?

- Men o‘zbek futbolini bir muncha vaqtdan beri va ayniqsa, yaqindan kuzatib kelaman. Chunki bu erda bir qator ispaniyalik murabbiylar ishlashganidan xabarim bor. Chempionatingizga juda ham qiziqib qolganman. Bilamanki, O‘zbekiston chempionati qiziqarli. Ancha-muncha saviyali futbolchilarni jamlagan Osiyoning etakchi birinchiliklaridan biri.

- Agar imkoni tug‘ilsa, yurtimizda murabbiylik faoliyatingizni olib borgan bo‘larmidingiz?

- Qachonki, men o‘ziga xos maqsadlarga to‘la loyihani ko‘rishim bilan va ularning o‘sishga harakat qilayotganini his qilsam, bunday istiqbolli rejani bajarish uchun albatta boraman. O‘zbekistonda ishlash uchun juda ochiqman. Osiyo chempionati mobaynida bu davlatda bo‘lib, nihoyatda mehrim tushib qoldi. O‘zbekiston har tomonlama menga yoqdi.

Shuhratbek Jo‘raev.