"Машъал" байрамга тайёрланмоқда. Чунки...

Бугун Про лиганинг 24-турига старт берилади. Мусобақа жадвалида пешқадам бўлиб турган Муборакнинг “Машъал” жамоаси ўз майдонида Тошкентнинг “Олимпик-Мобиуз” жамоасига қарши майдонга тушади.  Айтиш лозимки, бу жамоалар ўртасидаги тўртинчи баҳс ҳисобланади.

Муборакда бўлиб ўтадиган “Машъал” - "Олимпик-Мобиуз" учрашувини Алишер Тўхтасинов бошқариб боради. Унга қанотларда Шоҳрух Аъзамов  ва Азиз Исоқовлар ёрдам беришади. Заҳира ҳаками Найим Қосимов. Ҳакамлар ишини Қаҳрамон Йўлдошев назорат қилади. Учрашув комиссари. Ойбек Юнусов

Ўзаро ўйинларга тўхталадиган бўлсак, “Машъал” ва “Олимпик-Мобиуз” шу кунгача чемпионат баҳсларида 3 марта тўқнаш келган. “ Машъал ” 2 та ўйинда ғалаба қозонган ва 1 ўйин дуранг билан якунланган. Муборакликлар рақиб дарвозасини 4 бор ишғол қилган бўлсалар, тошкентликлар ҳали “Машъал” дарвозасига йўл топа олишгани йўқ. “Машъал”нинг ўзаро ўйинларда қозонган энг йирик ғалабаси – 3:0 га тенг.

Айни пайтда Асрор Алиқулов жамоаси 24 та ўйиндан сўнг 47 очко жамғариб 1-ўринда боряпти. 2-поғонадаги “Бухоро” 23 учрашувда 45 очко тўплади. Олдинда яна 5 та тур қолди. 3-ўриндаги “Шўртан” ҳисобида 24 та ўйиндан сўнг 35 очко мавжуд. Ҳисоб-китоблар шуни кўрсатяптики, “Машъал” клуби яна иккита ўйинда ютадиган бўлса, муддатидан илгари Суперлига йўлланмасини нақд қилиб қўяди. Шундай экан, “Олимпик Мобиуз”га қарши беллашув Алиқулов жамоаси учун муҳим.

“Машъал”ни бугунги ўйиндан ташқари шунингдек, “Шўртан”, “Бухоро”, “Хоразм” ҳамда “Дўстлик” жамоаларига қарши ўйинлари бор. Муборакликлар деярли Суперлига остонасида ва бундай имкониятни қўлдан чиқариб юборишмаса керак. Қисқаси, "Машъал" байрамга тайёрланмоқда!