"Машъал" устози: "Яна ўша хатолар, билмадим, бу нима билан боғлиқ?"

Cуперлигада 18-турга старт берилди. Жиззахда “Сўғдиёна” ҳамда “Машъал” ўртасидаги учрашувида майдон эгалари 2:0 ҳисобидаги ғалабасини расмийлаштириб олди. Муборакликлар 11-мағлубиятини қабул қилиб олди.

Биласиз, иккинчи давра олдидан “Машъал”да бош мураббий ўзгарди. Асрор Алиқулов U21 жамоасига ўтказилди. Унинг ўрнини Отабек Нарзуллаев эгаллади. Бироқ ҳозирча “Машъал”ни бошқараётган мутахассис фақат мағлубиятга учрамоқда.

Табиийки, маҳаллий мухлисларни жамоасининг бундай натижаларидан кўнгли тўлмаяпти. Бош мураббий Отабек Нарзуллаевга балки бироз вақт керакдир. Лекин факт шуки, "Машъал"нинг ҳозирча унинг бошчилигида ҳозирча омади чопмаяпти.

Нарзуллаев Жиззахдаги ўйиндан кейин матбуот анжуманида қуйидагиларни айтди:

- Биз уч очко учун келгандик. Жамоамизга озгина омад етишмади. Яна ўша хатолар эвазига дарвозамиздан голлар ўтказиб юборяпмиз. Билмадим, бу нима билан боғлиқ? Ҳар томонлама футболчиларга тушунтиряпмиз, ўргатяпмиз. Кўпроқ меҳнат қилишга тўғри келяпти. Яхши савиядаги йигитлар йиғилган. Фақат жамоани ўзига бўлган ишончи етишмаяпти. Кейинги ўйинларга пухта тайёрланамиз. Мағлубиятлар кўпайиб кетди. Ғалаба қозонишга ҳаракат қиламиз.

- Янги легионер Умар Амину ҳақида фикрингиз?

- Икки-уч кун олдин келди. Яхши савиядаги футболчи. У ўйин олди машғулотига қўшилди. Бу ўйинда 15-20 дақиқа майдонга туширдик.Жисмоний ҳолати яхши эмас. Амми савияси яхши ва ундан фойдалансак бўлади. Кейинги учрашувларда насиб бўлса уни асосий таркибга чиқарсак керак.