"Машъал" яна сенсацияга қодирми ёхуд "Пахтакор"га қарши қизиқарли статистика ҳақида

Суперлигада 4-тур 4 апрель кунидан бошланади. Унгача эса сиз билан бизнинг эътиборимиз 2 апрель куни бўлиб ўтадиган баҳсга қаратилади. 19:30 да бошланадиган “Пахтакор” – “Машъал” қарама-қаршилиги 1-турнинг қолдирилган ўйини сифатида ўтказилади. Шу боис кўпчилик ушбу учрашувни шунчаки ўтказиб юбормаса керак.

Достон Раҳмонов бошчилигидаги ҳакамлар бригадаси бошқариб борадиган учрашувда табиийки, “Пахтакор” фаворит. Клубнинг уй стадиони таъмирланаётгани боис рақибларини “Жар” стадионида қабул қилмоқда.

Биласиз, “Пахтакор” учун чемпионат кутилмаганда омадсиз бошланди. “Шерлар” португалиялик мутахассис қўл остида аввалига Олмалиқда ОКМКга (2:0), сўнг Тошкентда “Динамо”га (1:0) имкониятни бой бериб қўйди. “Шерлар” илк ғалабасини “Машъал” билан ўйинда қўлга киритмоқчи. Про лигадан Суперлигага қайтган муборакликлар ҳисобида иккита ўйиндан сўнг битта ғалаба бор. Аввалига Самарқандда “Динамо”га ягона гол эвазига ютқазиб қўйган. Ўтган турда Жиззахда “Сўғдиёна”ни 1:0 ҳисобида енгишнинг уддасидан чиқди ва бу “Машъал”га жиддий қараш кераклигини кўрсатмоқда.

“Пахтакор” ва “Машъал” сўнгги бор 4 йил муқаддам – 2021 йилги мавсумда тўқнаш келишган. Ўшанда “Пахтакор” Тошкентда 3:0, Муборакда 0:1 натижасида билан устун келган. Жамоаларнинг Ўзбекистон чемпионатидаги илк учрашуви 1995 йилнинг 6 май санасига тўғри келади. Ўшанда “пахтакор”чилар уйида 3:0 ҳисобида ғолиб чиққан.

Умумий ҳисобда мазкур клублар шу пайтгача миллий чемпионатимизда 38 бор куч синашишган. Албатта, катта устунлик “Шерлар” томонида. Улар 27 марта “Йўлбарслар”ни енгишга муваффақ бўлган. “Машъал”ни ҳисобида фақат 5 та ғалаба бор. Яна 6 учрашувда кучлар тенг келган. Тўплар нисбати 76х25 “Пахтакор”нинг фойдасига.

Биласизми, “Машъал” клуби “Пахтакор” майдонида фақат бир марта ғалаба қозонган. 2005 йилнинг 29 октябрь куни бўлиб ўтган баҳсда муборакликлар Тошкентдан 1:2 ҳисобидаги ғалаба билан қайтишган. Яна бир қизиқ жиҳати шундаки, “Пахтакор” 2012 йилгача Тошкентда “Машъал” дарвозасига фақат 3 тадан гол уриб келган. “Пахтакор” “Машъал”га қарши ўзи мезбонлик қилаётган ўйинларда учта гол уриб келаётганидан келиб чиқсак бугун ҳам шу ишини такрорлайдими ёки “Машъал” ўйин сценарийсини ўзгартира оладими?

Бу жамоалар 2 апрель санасида беллашишади. Шу кунгача клублар фақат бир марта ушбу кунда ўйин ўтказишган. 2007 йилги мавсумнинг биринчи даврасида “Машъал” ва “Пахтакор” Муборакда учрашишган ҳамда 1:1 ҳисобида якун топган. “Машъал” охирги марта “Пахтакор”ни 2017 йилда мағлубиятга учратган. Ўшанда ўз уйида 3:0 ҳисобида “Шерлар” таслим этилган.

Клубланинг ўзаро 39-ўйини бугун соат 19:30 да бошланади. Кўрамиз, “Шерлар” ва “Йўлбарслар” олишувида ким ғолиб чиқаркин?