Машҳур мураббий нега муаммоси катта жамоани қабул қилганини тушунтирди

Англия премьер-лигасининг жорий мавсумида инқирозни бошдан кечираётган “Тоттенхэм” тўртинчи бор янги бош мураббий тайинлади.

Италиялик мутахассис Роберто Де Дзерби муаммолар гирдобида қолган ва қуйи лигага тушиб кетиши мумкин бўлган Лондон жамоасини қабул қилгани сабабларини айтди.

- Клуб раҳбарияти билан бўлган барча суҳбатларимда уларнинг келажакка бўлган амбициялари аниқ эди — катта ютуқларга эриша оладиган жамоа тузиш ва буни мухлисларимизни илҳомлантирадиган, руҳлантирадиган футбол орқали амалга ошириш.

Мен бу ердаман, чунки бу мақсадларга ишонаман ва уларга эришиш учун барча кучимни сарфлаш мақсадида узоқ муддатли шартнома имзоладим.

Қисқа муддатли режада эса бизнинг устувор вазифамиз — Премьер-лига жадвалида юқорига кўтарилиш, мавсумнинг сўнгги ўйинидаги охирги ҳуштаккача бу асосий вазифамиз бўлиб қолади.

Машғулотларни бошлашни ва ушбу мақсадга эришиш учун футболчилар билан ишлашни интизорлик билан кутяпман, - деди Роберто де Дзерби “Тоттенхэм” расмий сайтига берган интервьюсида.

Англия чемпионатининг 31 туридан сўнг “Тоттенхэм” 30 очко тўплаб, 17-ўринни эгаллаб турибди.