Машҳур юлдуз терма жамоага бош мураббий бўлди

Мадриднинг "Атлетико" клуби собиқ ҳужумчиси Диего Форлан Уругвай терма жамоаси бош мураббийи сифатида Марсело Бьелса ўрнини эгаллади. Бу ҳақда Уругвай футбол ассоциацияси (AUF) президенти Игнасио Алонсо маълум қилди.

Уругвай терма жамоаси АҚШ, Канада ва Мексикадаги жаҳон чемпионатида, 2022 йилдаги мусобақада бўлгани каби, плей-офф босқичига чиқа олмади. 

Май ойида Марсело Бьелса жаҳон чемпионати якунлангач, терма жамоани тарк этишини эълон қилган эди. 

- AUF ижроия қўмитаси Диего номзодини маъқуллади. Биз у билан ҳали 2022 йилдаёқ учрашиб, лойиҳамизга жалб этишга ҳаракат қилган эдик. Ҳозир у жуда руҳланиб турибди, – дея Алонсо сўзларини келтиради Marca нашри. 

Маълум қилинишича, Форлан камида 2027 йилнинг март ойигача миллий жамоага раҳбарлик қилади. Шундан сўнг AUF янги мутахассис излаш ёки Форлан билан ҳамкорликни давом эттириш масаласини кўриб чиқади. 

Янги бош мураббий шунингдек 20 ёшгача бўлганлар терма жамоаси билан ҳам ишлайди. Ушбу ёшлар жамоаси январь ойида ёшлар ўртасидаги Америка кубоги мусобақасида иштирок этади. 

47 ёшли Форлан беш йиллик танаффусдан сўнг яна мураббийлик фаолиятига қайтмоқда. У бунгача Уругвайнинг "Пеньяроль" ва "Атенас" жамоаларини  бошқарган. Футболчи сифатида Форлан "Манчестер Юнайтед" таркибида Англия чемпиони бўлган. "Атлетико" билан Европа Лигаси ва УЕФА Суперкубоги ғолиблигини қўлга киритган. Шунингдек, у икки карра "Олтин бутса" соҳиби (2005, 2009) ва 2010 йилги жаҳон чемпионатида энг яхши ўйинчи, деб топилган.