Машрабжон Рўзибоевнинг рақиби аниқ. У Москвада жанг қилади.

12 сентябрь куни Россиянинг Москва шаҳрида ММА бўйича "Open Fighting Championship" промоушени навбатдаги турнирини ўтказади. Мазкур кечада юртдошимиз Машрабжон Рўзибоев ҳам октагонга кўтарилиши ҳақида маълумот берган эдик. 

Бироқ, унинг рақиби маълум эмасди. Бунга ҳам аниқлик киритилди. Москвада ҳамюртимиз мезбонлар вакили Александр Захаровга қарши жанг қилади. Мазкур жанг ярим ўрта вазн (77.1 кг) тоифасида ўтказилади. 

Россиялик жангчи фаолияти мобайнида 3 та ғалаба ва бир мағлубият қайд этган бўлса, Машрабжон Рўзибоевнинг кўрсаткичи 11-3-1 кўринишга эга. 

Эслатиб ўтамиз, ушбу жанг оқшомида Машрабжоннинг акаси Нурсултон Рўзибоев ҳам бразилиялик Лучиано Континига қарши октагонга кўтарилади.