Мбаппе: Винисиусни беш марта маймун дейишди

Мадриднинг “Реал” жамоаси ҳужумчиси Килиан Мбаппе Европа Чемпионлар лигасида “Бенфика”га қарши ўтказилган плей-офф учрашуви нега тўхтатилгани ҳақидаги можаро тафсилотларини очиқлади.

Бу баҳсда “Реал” Лиссабонда “Бенфика”ни 1:0 ҳисобида мағлуб этди. Ғалаба голини Винисиус киритди.

Кейинчалик ўйин тўққиз дақиқага тўхтатилди, чунки гол муаллифи бош ҳакам Франсуа Летексьега ирқий ҳақоратлар ҳақида шикоят қилди.

Танаффусдан сўнг ўйин қайта бошланди.

- Вини гол урган ва уни нишонлаганидан кейин “Бенфика”нинг 25-рақамли футболчиси, мен унинг исмини айтмайман, чунки у бунга арзимайди, қабул қилиб бўлмайдиган сўзларни ишлата бошлади.

У Винини беш марта маймун деб атади! Беш марта!

Мен унинг ҳали ёш эканини биламан, лекин бу эътиборсиз қолмаслиги керак. Бу йигит Чемпионлар лигасида яна ўйнашга лойиқ эмас. Бугун футбол қадриятлари йўқолди, - деди Мбаппе.

Таъкидлаш жоизки, “Бенфика”да 25-рақам остида 20 ёшли Жанлука Престианни ўйнайди.

Marca маълумотига кўра, Мбаппе ўйин давомида бир неча бор Престианнига бақириб, уни ирқчи деб атаган.

Жавоб ўйини 25 февраль куни Мадридда бўлиб ўтади.