Мбаппеда Роналдунинг номини ўчириш учун иккита ўйин бор

Мадриднинг “Реал” клуби футболчилари Испания чемпионатининг 16-турида “Алавес” жамоаси меҳмони бўлиб, қийин ўтган учрашувда 2:1 ҳисобида ғалаба қозонди.

“Қироллик клуби”  ҳужумчиси Килиан Мбаппе учрашувда ҳисобни очишга муваффақ бўлган эди. Бу гол 26 ёшли франциялик футболчини жаҳон футболида энг кўп гол урган Криштиану Роналдунинг “Реал”даги рекордига яқинлаштирди.

Гап шундаки, португалиялик юлдуз 2013 календарь йили ҳисобида мадридликлар сафида жами 59 та гол урган. Килиан Мбаппе Роналдунинг бу натижасини шу йилнинг ўзида янгилаши мумкин.

“Алавес” дарвозасига киритилган тўп Мбаппе учун 2025 календар йилидаги 56-гол сифатида қайд этилди. Килиан ўзининг кумири ҳисобланган Криштиануга етиб олиши учун учта, ундан ўзиб кетишига эса, тўртта гол керак.

Бунинг учун Мбаппе ихтиёрида иккита учрашув бор. “Реал” жорий йил охиригача Испания кубогида “Талавера”га қарши майдонга чиқса, Ла Лигада “Севилья” билан тўқнаш келади.

Мбаппе “Реал”да 2024 йилдан бери тўп суриб келмоқда. Футболчининг клуб билан шартномаси 2029 йилгача мўлжалланган. Жорий мавсумда француз футболчиси барча мусобақаларда 25 та ўйинда иштирок этиб, 27 та гол ва 4 та голли узатма қайд этган.