"Мен ҳам "Андижон" билан бирга тарихга кирдим, "Хоразм" аутсайдер бўлиб қолмайди". Илҳом Алижонов энди урганчликлар шарафини ҳимоя қилади

15 йил деганда Суперлигада қатнашиш имкониятини қўлга киритган “Хоразм” клуби янги мавсум учун таркибини кучайтириш ишларини давом эттиряпти.

Яқинда “Андижон” билан хайрлашган ҳимоячи Илҳом Алижонов урганчликлар таркибига қўшилди ва бир йиллик шартнома имзолади.

Шундан сўнг футболчи “Хоразм” аъзоси сифатидаги илк интервьюсини берди.

- Илҳомжон "Андижон" клубидаги 3 йиллик фаолиятингиз қандай ўтди ва сиз учун энг эсда қоладигани нима бўлди?

- “Андижон”да 2022 йилда келган бўлсам, уч йил фаолият олиб бордим. Буни ўзим учун яхши натижа деб ўйлайман. Биринчи йили келганимда жамоа про лигада эди. Суперлигага олиб чиқдик. Кейинги йилга мураббий алмашди ва Виктор Кумиков ўрнига Александр Хомяков тайинланди. Ушбу мураббий қўл остида ҳам икки йил тўп сурдим. Биринчи йили 7-ўринни олдик, ўтган йили Кубок соҳиби бўлдик ҳамда тарихга кирдик. Мен учун энг катта ютуқ – бу шубҳасиз Кубокни ютганимиз бўлди. Мен ҳам “Андижон” клуби билан биргаликда тарихга кирганим эсда қоларли натижага айланди. Яна шуни айтмоқчиманки, биринчи бўлиб про лигада мени жамоага қабул қилган Жаҳонгир ака Нуритдинов ва Элбек ака Саматовга катта раҳмат айтаман. Шу инсонлар мени Суперлигага қайтиб шунчалик ўйнашимга сабабчи бўлишди. Жамоадошларим билан яхши ва ёмон кунларда доимо бирга бўлдик. Мураббийларга ҳам миннатдорчилик билдираман. “Андижон” мухлисларига алоҳида раҳмат. Уларга ҳар доим омад тилайман. Бу йил ОЧЛда қатнашишади ва унда ҳам клубга ва ишқибозларига омад тилаб қоламан. Фан-клуб тўхтамасин ва бундан ҳам ажойиб тарзда қўллаб-қувватлашда давом этаверсинлар.

- Эндиликда "Хоразм" шарафини ҳимоя қиласиз. Бу клуб таклифини қабул қилишингизга нима туртки бўлди?

- “Хоразм” жамоасига қўшилдим. Мен учун бу таклифни қабул қилиш жуда қийин бўлди. Нимагаки, бир клубда уч йил ўйнаб, кейин бошқа жамоага кетиш оғир. “Хоразм”га ўтишимга туртки бўлган энг биринчиси – бу мураббий. Ҳаким Фузайловни яхши билганлигим учун келдим. У ҳам яхши коллектив йиғади. Мураббийнинг ишончи сабабли ушбу клубга келдим.

- "Бургутлар" оиласини тарк этиш сизга қийин кечмадими?

- “Андижон”ни тарк этиш тўғриси қийин бўлди. Баъзида кечалари билан кетайми-кетмайми, деб ўйланиб чиқдим. Футбол шунақада, бир у ерда, бир бу ерда ўйнайсиз. Қачондир тарк этиш керак эди. Шу бу йил экан, мазкур ҳолат юз берди. Албатта, тарк этиш осон бўлмади.

- Янги жамоада қандай қарши олдилар ва мослашув қандай кечяпти?

- Янги жамоада мураббий ҳам, раҳбар ҳам жуда яхши таниш. Футболчиларнинг кўпи билан ҳам бирга ўйнаганмиз. Мослашув қийин кечгани йўқ. Ҳаммаси аъло даражада.

- "Хоразм"га Суперлига йўлланмаси тақдим этилди. Шунга яраша жамоа қандай шакллантирилмоқда?

- “Хоразм” 15 йил деганда Суперлигага йўлланмани қўлга киритди. Бу “Хоразм” ва унинг халқи учун жуда қувонарли ҳолат бўлди. Худо хоҳласа, Суперлигадаги барча рақибларга бош оғриғи бўладиган даражадаги жамоа ташкил қилиняпти. “Хоразм” аутсайдер бўлиб қолмайди. Таркиб ҳам маҳаллий ва тажрибали легионерлар билан тўлдириляпти.

- "Андижон"да 66-рақамда ўйнагансиз. "Хоразм"да қайси рақамни танладингиз?

- Ҳа, Андижон” 66-рақамда ўйнагандим. Ўйлайманки, “Хоразм”да ҳам 66-рақамда тўп сураман.

- Суперлигада клублар сони 16 тага оширилганига муносабатингиз қандай?

- Суперлигада клублар 16 та бўлгани жуда яхши. Чунки энди ўйинлар янада кўп бўлади. Бу мухлислар учун ҳам, футболчилар учун ҳам ниҳоятда ижобий.