Men “Real”da sindim!

“Betis” tarkibida Ispaniya chempionatining eng kuchli futbolchilari qatoriga qo‘shilgan Isko “Real”dagi muvaffaqiyatsizliklar uchun o‘zi aybdor ekanini va buni vaqt o‘tishi bilan tushunib etganini ta’kidladi.

- “Real”da sinib qoldim. Vaziyatni o‘nglash, hammasiga sabr qilish uchun ruhan kuchim etmay qolgandi. O‘zimni klub qurboni, deb yurgan edim. Aslida bunday emas ekan.

O‘sha paytda o‘ynash ishtiyoqi qolmagandi. Asosiy tarkibga kirish uchun kurashishni ham istamasdim. Hozir hammasini tushunib etdi va afsusdaman. Buni ancha vaqt o‘tgandan keyin aytyapman.

Ayni paytda futboldan bahra olib, yosh boladan mazza qilyapman, - dedi Isko.

Isko “Real”ga 2013 yili “Malaga”dan o‘tgan edi. 2022 yili Madridni tark etib, “Sevilya”ga o‘tdi. Bu jamoada to‘rt oy o‘ynaganidan keyin Andalusiyadan ham ketdi.

Yarim yil jamoasiz qolgan Isko o‘tgan yoz “Betis”dan qo‘nim topdi. Joriy mavsumda 31 yoshli futbolchi barcha turnirlarda 27 ta o‘yin o‘tkazib, oltita gol va beshta assist qayd etdi.