Мени “Барса”нинг икки ўйинчиси ҳайратга солди

Европа Чемпионлар лигасининг умумий босқич биринчи турида Испаниянинг амалдаги чемпиони “Барселона” Англияда “Ньюкасл”ни 2:1 ҳисобида енгиб, уйига уч очко билан қайтди.

“Манчестер Сити”дан ижара асосида “Эвертон”га кўчиб ўтган машҳур футболчи Жек Грилиш бу учрашув ҳақида фикр билдириб, ўзини ҳайратга солган ўйинчилар номини айтди. Англиялик футболчи ўйинда иккита гол уриб, каталонияликлар ғалабасини таъминлаган ҳамюрти Маркус Рэшфордни эмас, бошқа ўйинчиларни эътироф этди.

- Педри ва Френки де Йонгнинг ўйинини кузатиш, жуда катта мароқ берди, - деб ёзди 30 ёшли футболчи ўзининг ижтимоий тармоқдаги саҳифасида.

Эслатиб ўтамиз, Жек Грилишнинг ўзи 2023 йили “Манчестер Сити” таркибида Европа Чемпионлар лигаси ғолибига айланган эди.