Месси билан муносабатлар бузилган

“Барселона” президенти лавозимига номзод Жоан Лапорта “Интер Майами” ҳужумчиси Лионель Месси ва унинг 2021 йилда клубдан кетиши ҳақида фикр билдирди.

Унинг сўзларига кўра, аргентиналик юлдуз билан янги шартнома имзоланмаганига сабаб — бу клуб учун зарарли, деб ҳисобланган. У “Барселона” ҳар қандай футболчи, директор ёки президентдан устун эканини таъкидлаган.

Лапорта Месси билан муносабатлар бузилганини айтди ва “Олтин тўп” маросимида саломлашув билан боғлиқ нохуш ҳолат ҳам бўлганини қайд этди.

Шунга қарамай, кейинроқ томонлар муносабатида маълум даражада яқинлашув бўлган. Лапорта Мессини “Барселона” афсонаси, деб билишини ҳам алоҳида эътироф қилди.

Лионель Месси 2003–2021 йилларда клуб тизимида тарбияланган ва энг зўр футболчилардан бўлган. Моҳир чарм тўп устаси каталонияликлар сафида 778 ўйинда 672 та гол урган ва жам 35 та соврин ютган. Бу совринлар орасида 10 та Ла Лига чемпионлиги ва 4 та Европа Чемпионлар лигаси ғолиблиги ҳам бор.