Месси Жаҳон чемпионати ярим финалининг энг яхши ўйинчиси деб топилди

Аргентина терма жамоаси сардори Лионель Месси Англияга қарши жаҳон чемпионати ярим финалида майдондаги энг яхши ўйинчи сифатида тан олинди. Бу ҳақда Халқаро футбол ассоциацияси (ФИФА) расмий сайтида маълум қилинди.

Чоршанба куни бўлиб ўтган баҳсда Аргентина Англияни 2:1 ҳисобида мағлуб этди ва шундай қилиб, кетма-кет иккинчи бор жаҳон чемпионати финалига йўл олди.

Месси ушбу ўйинда икки бор ҳал қилувчи пас бериб, жамоасининг иродали ғалабасида асосий фигуралардан бирига айланди.

Шу тариқа, аргентиналик юлдуз мусобақада ўтказган етти учрашувнинг бештасида “ўйин қаҳрамони” сифатида эътироф этилди. Унга бундан аввал ҳам бир қатор ўйинлардан сўнг ушбу унвон берилган эди.

Жумладан, гуруҳ босқичида Алжир (3:0) ва Австрияга (2:0) қарши учрашувларда, шунингдек, 1/16 финалда Кабо-Верде (3:2) ва 1/8 финалда Миср (3:2) терма жамоаларига қарши ўйинларда Месси энг яхши футболчи деб топилган.

Жаҳон чемпионати финали 19 июл куни бўлиб ўтади. Ҳал қилувчи беллашувда Аргентина Испания терма жамоасига қарши майдонга тушади.