Месси охирги учрашувида Аргентинанинг барча голларида иштирок этди
Фаолиятини сал эрта якунлаётгани билиниб қолди
Сўнгги йилларнинг энг ёрқин футбол юлдузи Лионель Месси терма жамоа сафидаги фаолиятини ғалаба билан якунлади. Буэнос-Айресда бўлиб ўтган халқаро ўртоқлик учрашувида Аргентина миллий жамоаси Бенин термасини йирик ҳисобда мағлуб этди — 3:0.
Бу беллашув саккиз карра "Олтин тўп" соҳиби Лионель Месси учун "альбиселесте" таркибидаги охирги ўйин сифатида тарихга кирди. 48-дақиқада Николас Отаменди ҳисобни очди, унга голли узатмани Лионель Месси берди.
61-дақиқада Николас Пас иккинчи голни урди, унга ҳам ҳал қилувчи пасни Месси йўллади. 71-дақиқада эса Лионель Месси пенальтини аниқ амалга ошириб, ҳисобни йирик кўринишга олиб чиқди.
Месси майдонга жамоа сардори сифатида бошидан тушди ва бутун ўйинни тўлиқ ўтказди. У бир гол урди, икки марта голли узатма берди ва яна бир бор ўзининг етакчи ўйинчи эканини намойиш этди. Бу беллашув аргентиналик ҳужумчи учун миллий жамоа сафидаги 208-ўйин бўлди. Голлари сонини эса, 126 тага етказди. Бу жаҳон футболида терма жамоаси учун 146 та тўп киритган Криштиану Роналду натижасидан кейинги иккинчи кўрсаткичдир.
Шу тариқа, Месси ўз мухлислари олдида, ватанидаги ўйин билан терма жамоа сафидаги карьерасига нуқта қўйди. 39 ёшли Лионель Месси Испания чемпионати, "Барселона" ва Аргентина терма жамоаси тарихида энг кўп гол урган футболчи ҳисобланади. Миллий жамоа билан бирга у икки марта Америка кубогини (2021, 2024) қўлга киритди, 2022 йилги жаҳон чемпионатида ғолиб чиқди, 2014 ва 2026 йилларда жаҳон чемпионатида кумуш медаллар соҳибига айланди. Шунингдек, 2022 йилда "Финалиссима" мусобақасида ҳам терма жамоа билан бирга ғалаба қозонди.
Изоҳлар (0)