Месси Роналдунинг рекордини янгилаб қўйди

"Интер Майами" ҳужумчиси Лионел Мессининг "Лос-Анжелес Гелакси"га (3:1) қарши ўйиндаги голи 38 ёшли футболчи фаолиятидаги 875-гол бўлди. Аргентиналик футболчи бундай натижага тарихда энг тез эришди, у буни 1116 та ўйинда амалга оширди. Шунингдек, Месси рақиблар дарвозасини 875 маротаба ишғол қилган энг ёш футболчига айланди. Бу ҳақда Goal хабар бермоқда.

Маълумот ўрнида, португалиялик юлдуз Криштиану Роналду 875-голини 2024 йили "Ал-Фатиҳ" клубига қарши урган эди. Ўшанда ҳужумчи 39 ёшда эди.

Месси "Интер Майами" сафида 2023 йилнинг ёзидан буён тўп суриб келмоқда. Бу вақт ичида у барча турнирларда 71 та ўйинда майдонга тушиб, 59 та гол ва 29 та голли узатмани амалга оширди. Футболчининг клуб билан амалдаги меҳнат шартномаси 2025 йил охиригача мўлжалланган. Transfermarkt порталида келтирилган маълумотларга кўра, футболчининг бозор нархи 18 млн еврони ташкил этади.