"Милан" "Интер"га қарши баҳсда чипталардан рекорд даражада даромад кўрди

“Милан” ўзининг Чемпионлар лигаси ўйинларида чипталардан рекорд даражада даромад кўрди. Мусобақанинг 1/8 финалида "Тоттенхэм"га қарши кечган уй учрашувида чипталардан 9 миллион еврога даромад олинган бўлса, "Интер" билан ўйинда бу борада янги рекорд ўрнатилди - 10 миллион евро. Аниқроғи, шу куни учрашувга ташриф буюрган 75 532 томошабин жами 10 461 705 евролик чипта харид қилган.

Аммо, иккинчи томондан, ушбу ўйин италиялик телетомошабинларда у қадар қизиқиш уйғотмаган. Клуб расмий сайтининг ёзишича, ҳатто “Наполи” билан бўлган чорак финал ўйинини мамлакатда 7,5 миллион киши томоша қилган, бироқ “Интер”га қарши баҳс бу қадар кўп томошабин тўплай олмади.

Эслатиб ўтамиз, "Милан" ва "Интер" ўртасидаги жавоб учрашуви ўн олтинчи май куни бўлиб ўтади.