"Милан"нинг икки футболчиси ўртасида келишмовчилик юз берди

"Милан" футболчилари Рафаэл Леау ва Кристиан Пулишич ўртасида А Серия 29-туридан ўрин олган "Лацио"га (0:1) қарши ўйиндан сўнг зиддият юзага келди.

Португалиялик футболчи 66-дақиқада захирага олинганидан кейин ғазабланган. Шундан сўнг, жамоа бош мураббийи Массимилиано Аллегри уни қучоқламоқчи бўлганида икки марта қўлини тортиб олган ва унга нимадир деган.

La Gazzetta dello Sport нашрининг ёзишича, Леау Адам Марушичнинг орқасидан югурганида, Пулишич икки ҳолатда унга тўп узатмаганидан норози бўлган. Рафаэл майдонда фаол имо-ишоралар қилди ва кийиниш хонасида шеригига эътироз билдиришда давом этди. Вазиятни юмшатиш учун Аллегри аралашишга мажбур бўлди.

Маълумот учун, "россонерилар" 60 очко билан турнир жадвалида 2-ўринда бормоқда ва пешқадам "Интер"дан 8 очко ортда қолмоқда.