Миржалол Қосимов иккита мағлубиятдан кейин: "Старт кутилмаган натижалар билан бошланди. Буни ҳам хайрли тарафи бўлиши керак"

ОКМК клуби кутилмаганда чемпионатни кетма-кет иккита мағлубият билан бошлади. Иккинчи турда олмалиқликлар сафарда “Хоразм”га қарши майдонга тушди ва унда 1:0 ҳисобида имкониятни бой беришди.

Ўйиндан кейинги матбуот анжуманида ОКМК бош мураббийи Миржалол Қосимов иштирок этди ва фикрлари билан ўртоқлашди.

- Қизиқарли ўйин бўлди. Қўлдан келганича ҳаракат қилдик. Ҳақиқатан “Хоразм” жамоасида иштиёқ кучли эди. Бу иккинчи бўлимда яққол кўриниб қолди. Биринчи бўлимда ҳам ёмон ўйин бўлгани йўқ. “Бунёдкор”га қарши ҳам биринчи бўлимда яхши ўйин бўлганди. Иккинчи бўлимда қанақадир тушунарсиз бўляпти. Рақибга имконият бердик ва улар бундан фойдаланишди. Биз эса имкониятлардан фойдаланишда оқсаяпмиз. “Хоразм”ни табриклаймиз. Хулоса чиқарамиз ва кейинги ўйинга тайёргарлик кўриб, ишлашда давом этамиз. Албатта, старт кутилмаган натижалар билан бошланди. Буни ҳам хайрли тарафи бўлиши керак.

- Бугунги учрашувдаги режаларингизни амалга ошишига нима халақит қилди?

- Айтяпман-ку, бўлим бошида яхши вазиятимиз бор эди. “Бунёдкор”га қарши беллашувда ҳам худди шунақа имкониятга эга бўлгандик. Бунақа ўйинларда чемпионат бошида кўп имкониятлар бўлмайди. Ўша яратилган вазиятлардан тўғри фойдаланиш керак. Албатта, чемпионат бошида кўпроқ стандартларга эътибор қаратилади. Шунинг учун кўп голлар стандартлардан урилади. Шу нарса панд беряпти, деб ўйлайман. Агар “Бунёдкор” билан ҳам, “Хоразм” билан ҳам вазиятлардан тўғри фойдаланганимизда ўйин бошқача бўлиши мумкин эди. Аммо гол ўтказиб юборилгандан кейин ҳаракатлари ва футболчилардаги кўзи “ёниши” биринчи бўлимдан бўлиши керак. Шу нарсалар асқотади.