Миржалол Қосимов: Ўрунов ва Шомуродовга ўхшаган футболчиларимиз кўп бўлишини тилайман

Coca Cola Суперлига 21-туридан ўрин олган "Қўқон-1912" - АГМК (1:0) учрашувидан кейинги матбуот анжуманининг дастлабки қисмида меҳмонлар устози Миржалол Қосимов иштирок этди. Бу ҳақда Қўқон клуби матбуот хизмати хабар берди.

"Албатта бугунги ўйинни шиддатли ва кескин курашлар остида ўтишини кутган эдик. Ҳақиқатдан ҳам, бу ўз тасдиғини топди. Айни дамда жамоамиз ҳам, қўқонликлар ҳам медаллар учун кураш олиб бормоқда.

Авваламбор, футбол бу – жанговор ўйин. Суҳроб Бердиевга соғлиқ тилаймиз. Футбол тўқнашувларга бой ўйин. Норбековнинг ҳам боши ёрилди. Албатта атайин қилингани йўқ. Ўз-ўзидан кўриниб турибдики, ҳар бир жамоа олдига қўйган мақсади учун астойдил ҳаракат қилди.

Бунақа ўйинларда вазиятлар унчалик кўп бўлмайди. Мурод Холмуҳаммедовнинг зарбаси гол бўлди ва “Қўқон-1912”га ғалаба келтирди. Аслида бугунги учрашув дуранг мос эди. Футбол шуниси билан қизиқ. Бугунги ғалаба билан қўқонликларни табриклайман. Чемпионатимиз ҳам якунига етиб бормоқда ва шиддатли ўйинлар кўп бўлмоқда. Албатта эгаллаб турган жойимизни сақлаб қолиш учун ишлаймиз. Жароҳат олган ўйинчиларга соғлиқ тилаб қоламиз.

Остон Ўринов, Элдор Шомуродовга ўхшаган футболчилар кўп бўлишини тилайман. Бошқа давлат, бошқа менталитетда ўйнаб кетиш осон эмас. Европада ўйнайдиган футболчиларимиз кўп бўлиши ўзбек футболининг ривожига катта ҳисса қўшади.

Ўзимизда мураббийлар бор, сероб. Лекин уларни ишлатиш клуб раҳбарларига боғлиқ.  Санжар Турсунов тажрибали футболчи ва у қанотларда ҳам марказда ҳам бемалол ўйнай олади. Шунинг учун уни бугун марказда қўйдик. Санжар бугун ёмон ҳаракати қилгани йўқ.

Ютқаздик, футболда бўлиб турадиган ҳолат. Нафақат бугун балки, “Насаф” билан бўлган баҳсда ҳам ғалаба учун майдонга тушган эдик. Совринли ўринлар учун курашаётган жамоа ана шундай ўзаро учрашувларда яхши натижа қайд этиши лозим. Бугун вазиятлардан фойдалана олганимизда тамоман бошқача бўлармиди?

Масалан, Ҳусниддин Ғофуров бирга-бир вазиятдан фойдаланганида бошқа ўйин гувоҳига айланган бўлардик. Бугун ҳар икки жамоа ҳам чиройли ўйин намойиш этишди. Мурод Холмуҳаммедовнинг кучли зарба соҳиби эканлигини билардик. Кутилмаганда берган зарбаси дарвозамиздан ўрин олди. Унинг зарбасини дарвозабонимиз ҳам кўролмай қолди.

Кейинги турда "Пахтакор" билан қандай ўйнаймиз? Башорат қилишни ёмон кўраман. Ҳар бир ўйинга ғалаба учун майдонга чиқамиз. Мақсадимиз мухлисларимизни хурсанд қилиш", - деди Қосимов.