MMA bo‘yicha O‘zbekiston chempionatida xato qilgan hakamlarga keskin chora ko‘rildi

SPORTS.uz O‘zbekiston aralash jang san’ati bo‘yicha o‘tkazilayotgan ochiq chempionatni yoritish maqsadida Navoiy shahrida bo‘lib turibdi. Kuni kecha yarim final bahslari o‘tkazildi. E’tiborimni bir omil tortdi.

Aralash jang san’ati assotsiatsiyasi vitse-prezidenti Muzaffar Rajabov, musobaqalar o‘tkazish bo‘limidagi asosiy hakam Otabek Musaev, o‘tkazilayotgan turnirning asosiy tashkilotchisi Dadaxon Hasanov birgalikda 18.12.2021 sanasida aralash jang san’ati bo‘yicha O‘zbekiston chempionati bahsida referi Nodir Jumanovning qo‘pol xatoga yo‘l qo‘yganini ma’lum qildi.

61.1 kg vazn toifasida o‘tkazilgan yarim final jangida Yoqubov Feruz (Toshkent) va Toshbotirov Sherdor (Samarqand) o‘rtasidagi jangda oktagonda ishlagan referi vaziyatni to‘g‘ri baholay olmagan. Toshbotirovning zarbasidan so‘ng Yoqubov Feruz redjga yiqilib, o‘z harakatini davom ettirish paytida  Referi Nodir Jumanov sportchi jangni davom ettira olishini ma’lum qilganiga qaramay,  bahsga yakun yasab yubordi. Afsuski, sekundantlar va zaldagi bosimni engib o‘ta olmagan Nodir Jumanov qo‘pol xatoga yo‘l qo‘ydi.

Xalqaro MMA qoidalariga ko‘ra, ushbu vaziyatda qanday chora qo‘llash kerakligi borasidagi qat’iy qoidalar mavjud. Unga ko‘ra, 11-bobning 2-punktida jangni kuzatayotgan bosh hakam oktagondagi referi qabul qilayotgan qarorlarini o‘zgartirishi, agar lozim bo‘lsa, uni vazifasidan ozod qilishi mumkinligi yozilgan. O‘sha bobning 4-punktida esa, bosh hakam oktagondagi referi noto‘g‘ri qarordan so‘ng jang yakunlangan bo‘lsa, uni davom ettirish huquqiga egaligi ma’lum qilingan.

Natijada, bosh hakam Dadaxon Hasanovni Nodir Jumaev bilan almashtirdi. So‘ngra, Yoqubov Feruz va Toshbotirov Sherdor o‘rtasidagi jangni davom ettirilishini ma’lum qildi. Qayta start olgan bahsda esa, Toshkent shahri vakilli raqibini chuqur nokautga uchratdi. Toshbotirov referi bergan vaqtda o‘ziga kelmagach, jang Feruz Yoqubovning foydasiga yakunlandi.

Bahsdan so‘ng, aralash jang san’ati vitse-prezidenti va hakamlar qo‘mitasi raisi birgalikda Nodir Jumanovni xatoga yo‘l qo‘ygani bois, 1 yil davomida janglarda ishtirok etish huquqidan mahrum qildi.