ММА: Ўзбекистон Кубогида ҳакамлар қандай ишламоқда?

Бухоро шаҳри аралаш жанг санъатлари бўйича ҳаваскорлар ўртасидаги илк Ўзбекистон кубоги турнирига мезбонлик қилмоқда. Унда 16-17 ёш ва ундан катталар ўз вазн тоифасида ғолиблик учун баҳсга киришган. Умуман олганда, мусобақанинг дастлабки саралаш жанглари жуда шиддатли тарзда ўтди. Ҳакамлар учун етарли даражада иш топилмоқда. Яъни, мусобақанинг адолатли ва шаффоф ўтишини таъминлайдиган инсонлар чин кўнгилдан меҳнат қилмоқда.

Биз ушбу мусобақанинг бош ҳаками ҳамда Ўзбекистон ММА ассоциациясининг ҳакамлар билан ишлаш бўйича етакчи мутахассиси Отабек Мусаевга турнирга оид бир нечта саволлар билан мурожаат қилдик.

- Айнан ушбу турнирни Бухорода ўтказилишининг асосий сабаби нимада?

- Биринчи навбатда, “Амир Темур” клуби асосчиси Музаффар Ражабовнинг ташаббуси билан мазкур мусобақа Бухоро шаҳрида ўтказилмоқда. Қолаверса, бу ерда яқиндагина карантин қоидаларига мувофиқ, профессионаллар ўртасида ўқув-машғулот йиғинлари ўтказилди. Демоқчиманки, барча шароитлар етарли ва ташкилотчилик юқори савияда бўлишига ишончимиз комил бўлганлиги туфайли, Бухоро шаҳри танланди.

- Турнирнинг дастлабки куни шуни кўрсатмоқдаки, ҳакамлик савияси анчагина ўсган. Шундай бўлса-да, яна қилинадиган ишлар борлиги аниқ. Бу борада қандай янгиликлар амалга оширилмоқда?

- Халқаро аралаш жанг санъати ассоциациялари федерацияси (IMMAF) билан ҳамкорликда жаҳоннинг етакчи ҳакамларини таклиф этмоқдамиз. Жумладан, Максим Протасов ҳакамларимиз иштирокидаги семинарларда иштирок этди ва маҳорат дарслари ўтди. Шунингдек, UFC промоушенида фаолият юритадиган Марк Годдардни ҳам таклиф этганмиз. Албатта, бу ишларни яна давом эттирамиз.

- Эҳтимол, ҳакамларнинг савиясини ошириш учун МДҲнинг етакчи промоушенларида фаолият олиб боришларини таъминлаш керакдир?

- Бу борада ҳам ишларни амалга оширмоқдамиз. Масалан, Тошкентда ўтган GFC турнирида вакилларимиз жангларни бошқарди. Қолаверса, юқорида таъкидлаб ўтганимдек, семинарлар орқали ҳакамларимиз халқаро лицензияни қўлга киритади ва шундай промоушенларда ишлаш имконияти пайдо бўлади. 

- Мусобақанинг бош ҳаками сифатида турнирнинг биринчи кундан кўнглингиз тўлдими? Яъни, қўл остингиздаги ҳакамларнинг баҳсли ҳолатларда чиқарган қарорлари сизни қониқтирмоқдами?

- Албатта. Барчаси адолатли тарзда ўтказилмоқда ва шундай давом этади. Эътирозлар бўлса, ўрганиб чиқамиз ва энг тўғрисини амалга оширамиз.

мма_3

- Жанг қоидаларида жиддий ўзгаришлар борми? Демоқчиманки, Тошкентда ўтказилган Ўзбекистон чемпионатидан фарқли қоидалар киритилмадими?

- Йўқ. Барчаси ҳаваскорлар ўртасидаги турнирларнинг қонун-қоиаларига мувофиқ тарзда ўтказилмоқда.

- Турнир ғолибларини қандай мукофотлар кутмоқда ёхуд улар қай тарзда тақдирланади?

- Муносиб рағбатлантирилади.

- Турнирнинг юқори савияда ўтиши бевосита сиз бошчилигингиздаги ҳакамлар жамоасига боғлиқ... Шундай экан, жангларни юқори даражада ўтказиш учун куч-қувват тилаймиз!

- Катта раҳмат. 

 

Матнда хатолик топсангиз, ўша хатони белгилаб, бизга жўнатинг (Ctrl + Enter)
/*desktop-news-footer*/

Минбар

Барча блоглар