Модрич Моуриньо қандай қилиб Роналдуни йиғлатганини айтиб берди

"Милан" ярим ҳимоячиси Лука Модрич фаолияти давомида бирга ишлаган мураббийлари, шунингдек, улар орасидаги энг қаттиққўли ҳақида гапирди. "Реал" собиқ аъзоси Роналду билан содир бўлган воқеа ҳақида ҳам сўзлаб берди.

- Моуриньо ўзига хос. Ҳам мураббий, ҳам инсон сифатида. Айнан у мени "Реал"да кўришни истаган, Жозесиз ҳеч қачон Мадридга бормаган бўлардим. Афсуски, биз атиги бир мавсумни бирга ишладик.

- Жозе Моуриньо, Карло Анчелотти ва Массимилиано Аллегри орасидан энг қаттиққўл мураббий ким?

- Моуриньо. Кийиниш хонасида Криштиану Роналдуни йиғлатиб юборганини кўрдим, у майдонда борини беради, лекин бир марта рақиб ҳимоячисини ортидан югурмагани учун Моуриньо уни роса пушаймон қилдирган.

Моуриньо футболчилар билан жуда тўғрисўз ва ҳалол. У Серхио Рамосга ҳам, янги келган футболчига ҳам бир хил муносабатда эди. Агар бирор нарса айтиш керак бўлса, у гапирарди. Макс (Аллегри) ҳам шундай: нима тўғри-ю, нима нотўғрилигини тўғридан-тўғри юзига айтади. Ҳалоллик - бу асос", - дея Модричнинг сўзларини келтиради Corriere della Sera.