Москвада “ўзбекча дерби”ни кўра олмадик

Ўзбекистонлик легионерларнинг жамоалари ўзаро тўқнаш келса, мухлисларимиз уларнинг майдонда бир бирига қарши қандай ўйнашини томоша қилишни истайди. Хусусан, бугун Россия премьер-лигасининг 17-туридан ўрин олган “Спартак” ва “Тамбов” учрашувида ҳам Остон Ўрунов ва Жасур Жалолиддинов дуэлини кўришни умид қилгандик.

Бироқ, ундай бўлиб чиқмади. Қишки трансферлар даврида “Спартак”дан кетиши кутилаётган Остон Ўрунов бу гал ҳам ўзига имкон берилишини кутиб узоқ ўтирди ва захирадаги ўриндиғини совутгани йўқ. Жасур Жалолиддиновга муаммолар гирдобига ғарқ бўлган “Тамбов”нинг қайдномасидан ҳам жой берилмади. Айрим маълумотларга қараганда, Жасур аллақачон юртимизга қайтиб келган.

Ўйин кутилганидек, мезбонлар устунлигида ўтди. Биринчи бўлим ўрталарида машҳур ҳужумчи Хенрик Ларссоннинг ўғли Жордан отаси қилган ишни қилди – рақиб дарвозасига тўп киритди.

63-дақиқада “Спартак”нинг аргентиналик ҳужумчиси Эсекьел Понсе  меҳмонлар дарвозасини иккинчи марта аниқ нишонга олди. Орадан бир дақиқа ўтар-ўтмас тамбовликлардан Герман Онугха гол уриб, ўйинга бир неча дақиқалик интригани қайтарди.

“Тамбов”нинг қаршилиги охиригача етмади. Сўнгги дақиқаларда яна Жордан Ларссон, Самуэль Жиго ва Эсекьел Понсе биттадан гол уриб, якуний ҳисобни ўрнатди – 5:1.

Эътибор беринг, “Спартак”нинг ғалабасини легионерлар – Швеция, Аргентина ва Франция футболчилари таъминлаб берди.

Остон Ўрунов эса 90-дақиқада майдонга тушди ва тўрт дақиқа ўйнади холос.