"Мослашиш мен ўйлагандек қийин бўлмади" - Осиё чемпионининг "Андижон"га ўтиши, асосий мақсади ва илк таассуротлари

"Андижон" клубига янги таклиф қилинган футболчилар орасида иқтидорли ҳужумчи Асилбек Алиев ҳам бор.

Ўтган йили U17 терма жамоамиз сафида Осиё чемпиони ва тўпурари бўлган футболчи эндиликда бор эътиборини "Андижон"даги фаолиятига қаратган.

Иқтидорли ўйинчи куни кеча клуб матбуот хизматига интервью берди.

- Асилбек, “Андижон” клубига хуш келибсиз! Илк ҳис-туйғуларингиз қандай?

- Катта раҳмат! “Андижон” каби катта клубга қўшилганимдан жуда хурсандман. Бу мен учун янги босқич, янги имконият. Шу ерда ўзимни кўрсатишни ва жамоага ёрдам беришни хоҳлайман

- “Андижон”га ўтиш қарори қандай қабул қилинди? Бу қарор ортида нима турибди? 

- Бу қарорни оилам ва мураббийларим билан маслаҳатлашиб қабул қилдим. “Андижон” менга ишонч билдирди. Худо хоҳласа, мен бу ишончни оқлаш учун бор кучимни сарфлайман.

- Жамоа ва муҳит ҳақида илк таассуротларингиз?

- Ростини айтсам, жамоага келганимда ҳамма мени жуда илиқ қарши олди. Ҳам ўйинчилар, ҳам мураббийлар. Барча очиқ ва дўстона. Илк кунларданоқ ўзимни янги муҳитда эмас, балки таниш жойдагидек ҳис қилдим. Машғулотлар яхши кайфиятда ўтяпти. Барчаси бир мақсад йўлида меҳнат қилишяпти. Шунинг учун мослашиш ҳам мен ўйлагандек қийин бўлмади.

- U17 Осиё чемпионатида ғолиб бўлиш ва тўпурар бўлиш — бу сиз учун нимани англатади?

- Бу менинг ҳаётимдаги энг ёрқин лахзалардан бири. Бу натижа фақат менинг эмас, бутун жамоанинг меҳнати самараси. Осиё чемпиони бўлиш, бу кўп нарсани англатади. Асосийси, тўхтаб қолиш йўқ. Яна келаётган Осиё чемпионатида биз янада кучлироқ бўлиб боришимизни ва чемпионликни яна Ўзбекистонга олиб келишни англатади, деб ўйлаймман.

- Жаҳон чемпионатида иштирок этиш ёш футболчи сифатида сизни қандай ўзгартирди?

- Менга катта тажриба берди. Дунёдаги кучли жамоаларга қарши ўйнаш орқали қайси жиҳатларда ўзим устида ишлашим кераклигини англадим.

- Терма жамоада ўйнаган ўйинлардан қайси бири хотирангизда энг кўп қолган?

- Терма жамоада эсда қоладиган ўйиним бу Саудия Арабистонига қарши бўлган учрашув. Икки футболчи кам бўлиб ютган ўйинимиз. Мана шуниси менимча, энг эсда қоларлиси.

- “Андижон” клуби олдига қўйган шахсий мақсадларингиз қандай?

- Асосий мақсадим — жамоага фойда келтириш ва ишончни оқлаш. Албатта, кўпроқ голлар уришни ҳам хоҳлайман

- Бу жамоада ўзингизни қайси позицияда энг яхши оча оласиз? 

- Ҳужумчи сифатида агарда зарур бўлса қанотларда ҳам ўйнай оламан.

- Мухлислар сиздан қандай Асилбек Алиевни кўришади? 

- Жанговор, майдонда фидойи ва охиригача курашадиган Асилбекни.

- Ўзингизни қайси жиҳатингиз билан бошқа ҳужумчилардан фарқ қиламан деб ўйлайсиз?

- Кўпроқ корпусда ўйнашим ва ҳимояга қайтиб ёрдам беришим ва ўйин давомида гапириб ўйнашим билан фарқ қиламан.

- Қийин пайтларда сизни руҳлантирадиган инсон ёки сўз борми?

- Оила ва ота-онамнинг сўзлари. Улар доим ишонади ва ҳар нарса меҳнатга боғлиқлигини айтишади.

- Футболда ўзингизга намуна деб билган ҳужумчи ким?

- Обамеянг. Унинг тезлиги, голни сезиши ва ҳаракатланиши менга жуда ёқади.

- Мухлислар сиздан майдонда нимани кутишлари мумкин? 

- Мухлислар мендан ҳар бир ўйинда бор кучим билан курашишимни кутишлари мумкин. Ҳар доим жамоа учун майдонда ҳам, майдон ташқарисида ҳам боримни беришга ҳаракат қиламан. Уларга нафақат голлар, балки, Худо хоҳласа меҳнат ва жонкуярлигимни кўрсатмоқчиман.

Қисқа блиц саволлар

- Гол уришми ёки жамоага фойда келтириш?

- Жамоага фойда келтириш.

- Чап оёқми ёки ўнг?

- Иккаласи ҳам фарқи йўқ. Лекин кўпинча ўнг оёқ.

- Сўнгги голингиз — қайси ўйинда?

- Сўнгги голим “Андижон” дарвозасига бўлди.

- Орзу: Европада ўйнаш ёки терма жамоада етакчи бўлиш?

- Худо хоҳласа, иккаласи ҳам мени орзуим

- Энг кучли жиҳатингиз?

- Энг кучли жиҳатим, кучли зарбам бўлса керак.