Моуриньо “Реал”га янги сардор тайинлади

Мадриднинг "Реал" жамоаси ва Уругвай терма жамоаси ярим ҳимоячиси Федерико Вальверде клубнинг янги бош сардорига айланиши кутилмоқда. Бу ҳақда Marca нашри хабар берди. Унга кўра, тажрибали ҳимоячи Даниэль Карвахаль жамоани тарк этгач, сардорлик боғичи Вальвердега топширилади.

Манба маълумотича, "қироллик клуби" бош мураббийи Жозе Моуриньо футболчининг келажагига нисбатан ҳеч қандай шубҳага эга эмас. Бу қараш 2026 йилги жаҳон чемпионатидаги омадсиз иштирокдан сўнг ҳам ўзгармаган. Португалиялик мутахассис Вальвердени июль ойи ўрталарида старт оладиган мавсумолди йиғинларданоқ асосий режага қўшмоқчи. Шу билан бирга, у бундан олдин футболчи билан шахсий суҳбат ўтказишни режалаштирган.

Клуб раҳбарияти ва мураббийлар штаби ҳам Карвахаль кетганидан кейин жамоада етакчилик масъулиятини айнан Вальверде ўз зиммасига олишига ишонмоқда. Ундан нафақат майдонда, балки кийиниш хонасида ҳам бошқа футболчилар учун намуна бўлиши кутилмоқда.

Федерико Вальверде 2016 йилдан бери "Реал Мадрид" тизимида фаолият юритиб келмоқда. Ўтган мавсумда у клуб сафида 49 та ўйин ўтказиб, рақиб дарвозаларига тўққиз марта аниқ зарба йўллади.