Моуриньо ўзига керакмас ўйинчини рақиб жамоага бериб юборди

“Рома” таркибига киритилмаган испаниялик ярим ҳимоячи Гонсало Вильяр фаолиятини А Сериянинг бошқа клуби – “Сампдория”да давом эттирадиган бўлди.

24 ёшли футболчи янги мавсум охиригача ижарага берилгани айтилмоқда. “Сампдория” расмий сайтида Гонсало Вильярнинг трансфери эълон қилинди.

“Сампдория”да мавсум охирида испан футболчининг трансфер ҳуқуқини сотиб олиб, 2027 йилгача шартнома тузиш имконияти бор.

Гонсало Вильяр Жозе Моуриньо келганидан бери “Рома” таркибига киритилмаяпти. Истеъдодли ярим ҳимоячи ўтган мавсумни ҳам “Хетафе”да якунлади ва ижара муддати тугаганидан кейин Римга қайтиб келди.

Илгари Гонсало Испаниянинг “Эльче” ва “Валенсия” клубларида ҳам тўп тепган.