Моуриньо "Реал" футболчилари билан алоқага чиққан

Жозе Моуриньо ёзда Мадриднинг "Реал" клубига бош мураббий сифатида қайтиши кутилмоқда.

"The Touchline" нашри журналист Мигель Серраного таяниб хабар беришича, португалиялик мутахассис сўнгги кунларда "қаймоқранглилар"нинг уч нафар футболчиси билан суҳбатлашган.

Манбага кўра, Моуринью Тибо Куртуа, Килиан Мбаппе ва Винисиус Жуниор билан мулоқот қилган.

Ҳозирда 63 ёшли мураббий "Бенфика"ни бошқармоқда. Лиссабон клуби 16 май куни "Эшторил"га қарши мавсумдаги сўнгги ўйинини ўтказади. Жамоа ҳозир Примейра жадвалида учинчи ўринда бормоқда.

Жозе Моуриньо 2010–2013 йилларда ҳам "Реал"ни бошқарган. Унинг қўл остида мадридликлар 2012 йилда Испания чемпионлигини қўлга киритган эди.