Муҳаммад Салоҳнинг янги клуби маълум бўлди

«Бешикташ» клуби «Ливерпуль» клубидаги фаолиятини якунлаган машҳур ҳужумчи Муҳаммад Салоҳни жамоага таклиф этгани хабар қилинди. Бу ҳақда туркиялик журналист Кая Темел маълумот берган.

Манбага кўра, томонлар ўртасида эҳтимолий шартнома молиявий жиҳатларига доир жиддий келишмовчиликлар сақланиб қолмоқда. Шу билан бирга музокаралар тўхтагани йўқ, жараён ҳали ҳам давом этмоқда.

Қайд этилишича, мисрлик футболчининг агенти Истанбулга етиб келган. У ерда у «Бешикташ» раҳбарияти билан юзма-юз учрашиб, эҳтимолий трансфер шартларини муҳокама қилиши кутилмоқда.

Салоҳ «Ливерпуль» таркибида тўққиз мавсум ўйнаб, жамоа билан бирга Чемпионлар лигаси, Англия чемпионати, Англия кубоги ва УЕФА Суперкубогини қўлга киритган. Ўтган мавсумда у 41 та ўйинда майдонга тушиб, 12 та гол урди ва 10 та голли пас берди. Transfermarkt портали 34 ёшли Салоҳни 22 миллион евро атрофида баҳоламоқда. Яқинда Муҳаммад эркин агент мақомини қўлга киритди.